عظمیٰ نیوز سروس
جموں//نائب وزیر اعلیٰ سریندر کمار چودھری نے کہا ہے کہ پونچھ۔ٹنگمرگ سڑک پروجیکٹ مرکزی وزارتِ برائے سڑک، ٹرانسپورٹ اور ہائی ویز (ایم او آر ٹی ایچ) کے ساتھ دوبارہ اُٹھایا جائے گا۔نائب وزیر اعلیٰ اَرکان وقانون ساز فاروق احمد شاہ کے سوال اور اعجاز جان و محمد اکرم چودھری کے ضمنی سوالات کا جواب دے رہے تھے۔اُنہوں نے کہا کہ پونچھ۔ٹنگمرگ سڑک جو لوران کے راستے سے گزرتی ہے، کو مرکزی حکومت نے منظور نہیں کیا ہے۔نائب وزیر اعلیٰ نے سڑک کے راستے میں تبدیلی کے حوالے سے ارکانِ اسمبلی کی جانب سے اُٹھائے گئے خدشات کا جواب دیتے ہوئے کہا کہ اِس معاملے کی جانچ کی جائے گی تاکہ سڑک کی تبدیلی کے مسئلے کو حل کیا جا سکے۔ اُنہوں نے مزید کہا کہ اس معاملے کو دیکھنے کے لئے ایک کمیٹی بھی تشکیل دی جائے گی جو متعلقہ اَفسران اور حکام کے ساتھ اس پر غورو خوض کرے گی۔اُنہوں نے مزید کہا کہ یہ ایک اہم سڑک ہے جو پیر پنجال کو وادیٔ کشمیر سے جوڑے گی اور سیاحت کو فروغ دے گی، ساتھ ہی نوجوانوں کے لئے روزگار کے مواقع پیدا کرے گی۔ اُنہوں نے یہ بھی کہا کہ اِس سڑک کو دونوں خطوں کے لوگوں کے لئے ثقافتی اور سماجی لحاظ سے بھی اہمیت حاصل ہے۔رہادس
بانڈی پورہ کی 2اہم سڑکوں کیلئے قومی شاہراہ کا درجہ زیر غور
عظمیٰ نیوز سروس
جموں// حکومت نے بانڈی پورہ کی کلیدی سڑکوں کو قومی شاہراہوں کے طور پر اعلان کرنے کیلئے سڑک ٹرانسپورٹ اور شاہراہوںکی وزارت سے منظوری طلب کی ہے، جس کا مقصد ضلع میں اسٹریٹجک اور اقتصادی رابطے کو فروغ دینا ہے۔بانڈی پورہ کے ممبراسمبلی نظام الدین بٹ کے سوال کے تحریری جواب میں نائب وزیر اعلیٰ سریندر چودھری، جن کے پاس منصوبہ بندی اور آر اینڈ بی کا قلمدان بھی ہے، نے کہا کہ حکومت اہم سڑکوں کے لنکس کو اپ گریڈ کرنے کیلئے سرگرم عمل ہے۔انہوں نے کہا کہ قومی شاہراہ کا درجہ حاصل کرنے کیلئے دو اہم راستوں، سنگرامہ،سوپور،وٹہ لب،بانڈی پورہ،سنبل (78کلومیٹر)اور سنبل، بانڈی پورہ،گریز، بشمول رازدان پاس (128کلومیٹر)پر ایک مجوزہ سرنگ کی سفارش کی گئی ہے۔ تاہم مرکزی وزارت سے حتمی منظوری کا ابھی انتظار ہے۔اس کے علاوہ، پردھان منتری گرام سڑک یوجنا (PMGSY)عمودیIV کے تحت، دیہی سڑکوں کے رابطے کو بڑھانے کی کوششیں جاری ہیں۔2024-25سے 2028-29تک پھیلے ہوئے اس پروجیکٹ کا مقصد 2011کی مردم شماری کے مطابق 250سے زائد آبادی والی بستیوں کو جوڑنا ہے۔گرام سڑک سروے ایپ کو فی الحال ایک تفصیلی رہائش کے سروے کیلئے استعمال کیا جا رہا ہے۔انہوں نے مزید کہا ’’سروے مکمل ہونے کے بعد، منظوری کیلئے دیہی ترقی کی وزارت (ایم او آر ڈی)کو ایک تجویز بھیجی جائے گی‘‘۔
