عظمیٰ نیوزسروس
جموں//جموں وکشمیر کے پونچھ ضلع کے مین بازار میں سیکورٹی فورسز نے اچانک تلاشی لی اور راہگیروں کے شناختی کارڈ باریک بینی سے چیک کئے۔اطلاعات کے مطابق سیکورٹی فورسز نے بدھ کے روز پونچھ کے مین بازار کو اچانک محاصرے میں لے کر لوگوں کی شناختی پریڈ کرائی۔ذرائع نے بتایا کہ ایس او جی ، پولیس اور سی آر پی ایف نے کافی دیر تک علاقے کی تلاشی لی جس دوران راہگیروں کے شناختی کارڈ چیک کئے گئے۔ذرائع کے مطابق تلاشی آپریشن کے دوران راہگیروں سے پوچھ تاچھ بھی کی گئی تاہم اس دوران کسی کے گرفتار ہونے کے بارے میں کوئی اطلاع موصول نہیں ہوئی ہے۔پولیس ذرائع نے اس کی تصدیق کرتے ہوئے بتایا کہ بدھ کی صبح سیکورٹی فورسز نے مین بازار پونچھ میں راہگیروں کے شناختی کارڈ چیک کئے۔انہوں نے بتایا کہ پونچھ ضلع میں سیکورٹی کے غیر معمولی انتظامات کئے گئے ہیں۔
