عظمیٰ نیوز سروس
پونچھ//پونچھ ضلع میں پولیس نے جمعرات کو دو مقامی افراد کو جعلی پولیس اہلکار بن کر شہریوں کو دھوکہ دینے کے الزام میں گرفتار کر لیا۔ پولیس نے اس کارروائی کو فراڈ اور جعلسازی کے خلاف اپنی سخت مہم کا حصہ قرار دیا ہے۔پولیس کے مطابق، گرفتار شدگان کی شناخت عرفان احمد ولد محمد صادق اور فیضان احمد ولد محمد صادق، ساکنان کلر کٹل، سرنکوٹ کے طور پر ہوئی ہے، جو خود کو پولیس اہلکار ظاہر کر کے مقامی لوگوں سے پیسے بٹور رہے تھے۔پولیس اسٹیشن سورنکوٹ نے اس معاملے کو سنجیدگی سے لیتے ہوئے فوری کارروائی کی اور ایف آئی آر نمبر 113/2025 زیر دفعہ 318(4)، 319(2) بھارتیہ نیایہ سنہیتا (BNS) درج کرتے ہوئے دونوں ملزمان کو گرفتار کر کے تفتیش شروع کر دی ہے۔ابتدائی تحقیقات سے معلوم ہوا ہے کہ یہ دونوں افراد علاقے میں کئی شہریوں کو پولیس کا نام لے کر گمراہ کر رہے تھے اور مالی فائدہ حاصل کر رہے تھے۔ضلع پولیس پونچھ نے عوام سے اپیل کی ہے کہ وہ ایسے جعلساز عناصر سے ہوشیار رہیں اور کسی بھی مشکوک سرگرمی کی اطلاع قریبی پولیس تھانے کو فوراً دیں۔پولیس کی جانب سے جاری سرکاری بیان میں کہا گیا ہے کہ عوام کو ایسے دھوکہ بازوں سے تحفظ فراہم کرنا پولیس کی اولین ترجیح ہے اور قانون نافذ کرنے والے اداروں کے نام یا وردی کے ناجائز استعمال کی ہرگز اجازت نہیں دی جائے گی۔
