حسین محتشم
پونچھ// محکمہ ایکسائز نے آج کالج گراؤنڈ پونچھ میں ایک روزہ کرکٹ میچ کا انعقاد کیا۔ اس میچ کا انعقاد محکمہ کی انسداد منشیات مہم کے تحت کیا گیا تھا جس کا موضوع تھا ’منشیات سے بچو کھیل کھیلو‘۔ ایونٹ کا انعقاد راہول ڈریوڈ کرکٹ کلب (RDCC) پونچھ کے تعاون سے کیا گیا تھا، جس میں تقریباً 100 کھلاڑیوں نے حصہ لیا۔ کھیلے گئے دو دلچسپ میچوں کے دوران کھلاڑیوں نے اپنی صلاحیتوں کا مظاہرہ کیا۔ یہ میچ قابل ایکسائز کمشنر جے اینڈ کے ایس سباش چندر چھیبر جے کے اے ایس اور ڈپٹی ایکسائز کمشنر ایگزیکٹیو سنجے کمار بھٹ جے کے اے ایس کی ہدایت پر اور ای ٹی او راجوری پونچھ رینج ایس سورج پرکاش کی نگرانی میں منعقد کیا گیا تھا۔ اس موقع پر مہمان خصوصی طارق خان انٹرنیشنل والی بال کوچ اور اسپورٹس اتھارٹی آف انڈیا کے ممبر اور شہید منجیت سنگھ والی بال کلب پونچھ کے چیئرمین تھے۔ وہ لیجنڈری کوچ ہیں جنہوں نے والی بال کے کھلاڑیوں کی رہنمائی کی ہے جو ہندوستان کی نمائندگی کر رہے ہیں اور حوصلہ افزائی کا ذریعہ ہیں۔
