حسین محتشم
پونچھ//گرمیوں کاسلسلہ شروع ہوتے ہی سرحدی ضلع پونچھ میں شہریوں کو پانی کی شدید قلت کا سامنا کرنا پڑ رہا ہے۔دور دراز اور پہاڑی علاقوں کی بات تو رہنے دیں شہر خاص میں لوگ پانی کی بوند بوند کو ترس رہے ہیں۔شہریوں کے مطابق ان کو جو پانی سپلائی کیا جاتا ہے وہ تین روز کے بعد ہوتا ہے اس دن بھی 15 منٹ ہی پانی چھوڑا جاتا ہے۔ شہریوں نے ایم ایل اے حویلی اور ضلع ترقیاتی کمشنر پونچھ کے نام کھلا پیغام دیتے ہوئے کہا ہے کہ ہم پونچھ شہر کے باشندوں کو پانی کی کمی کے سنگین مسئلے کا سامنا ہے۔انہوں نے کہا پانی کے قدرتی وسائل ہونے کے باوجود عوام پانی کی مناسب اور باقاعدہ فراہمی کے بغیر آئے روز مشکلات کا شکار ہیں۔انہوں نے کہا یہ کسی ایک وارڈ کی بات نہیں بلکہ شہر پونچھ کے ہر گھر کے لئے ایک بڑی پریشانی بن گیا ہے۔شہریوں کا کہنا تھا اگر ہمارے پاس قدرتی آبی وسائل ہیں تو پھر پونچھ شہر کے لوگ پانی کی کمی کا شکار کیوں ہیں۔انہوں نے کہا کہ پانی پمپ کرنے والی موٹریں اکثر کیوں جل جاتی ہیں، اس معاملے پر انکوائری کیوں نہیں ہوتی۔شہریوں کا کہنا تھا کہ جب متعلقہ محکمہ کے ملازموں سے ہم پوچھتے ہیں تو ہمیں بتایا جاتا ہے کہ بجلی کے بغیر کچھ نہیں ہو سکتا۔انہوں نے کہا اگر ایسا یے تو واٹر پمپنگ اسٹیشنوں کو بجلی کی خصوصی لائنیں کیوں فراہم نہیں کی گئیں تاکہ وہ بغیر کسی رکاوٹ کے چل سکیں۔انہوں نے کہا برسوں سے ہم سنتے آئے ہیں کہ نظام کو اپ گریڈ کیا جا رہا ہے اور پانی کی فراہمی میں بہتری آئے گی، لیکن زمینی سطح پر کوئی واضح پیش رفت نہیں ہوئی۔انہوں نے کہا ہم عاجزی سے پوچھتے ہیں: اگر شہر کو اس طرح کی مشکلات کا سامنا ہے، تو پھر ہم دیہاتوں سے کس ترقی کی توقع کر سکتے ہیں۔انہوں نے درخواست کرتے ہوئے کہا کہ بطور عوامی خدمت گزار عوام کی فلاح و بہبود کے لئے فوری اقدامات کریں۔ ہم 24 گھنٹے پانی کی فراہمی کے مستحق ہیں، خاص طور پر جب ہمیں قدرت نے پانی کے قدرتی ذرائع سے نوازا ہوا ہے۔ ہمیں امید ہے کہ آپ اس معاملے کو سنجیدگی سے لیں گے اور جلد از جلد عوام کو ریلیف فراہم کریں گے۔
