سرینگر//نیشنل کانفرنس نے بھاجپا کی طرف سے جموں وکشمیر کے پنچایتی راج ایکٹ میں 73ویں اور 74ویں ترمیم کے مطالبے کو دفعہ370کو کمزور کرنے کی ایک اور سازش قرار دیا ہے۔جنرل سکریٹری علی محمد ساگر نے کہا ہے کہ گذشتہ4سال کے دوران ریاست کو حاصل خصوصی مراعات کو ختم کرنے کیلئے مختلف طریقے اپنائے گئے’’کبھی سٹیٹ سبجیکٹ سرٹیفکیٹوں کی اجرائی کی کوششیں کی گئیں، کبھی شرناتھیوں کو مستقبل باشندگی دینے کی سازشیں رچائی گئیں، کبھی سینک کالونیوں کے قیام کے منصوبے بنائے گئے، کبھی پنڈت کالونیاں قائم کرنے کے اعلانات کئے گئے، کبھی 35اے کو ختم کرنے کیلئے جال بھنے گئے اور اب پنچایت راج ایکٹ میں مذکورہ ترامیم لانے کی باتیں کی جارہی ہیں‘‘۔ انہوں نے کہاکہ بھاجپا نہ صرف یہاں کے جمہوری نظام اور اداروںکو کمزور بنانے پر تلی ہوئی ہے بلکہ یہاں کی خصوصی پوزیشن کو زک پہنچانا بھی ان کے ارادوں میں شامل ہے۔ یہ لوگ پنچوں اور سرپنچوں کو بااختیار بنانے کے محض شوشے ڈال رہے ہیں، ریاست جموں وکشمیر میں نافذ پنچایت راج ایکٹ میں پہلے ہی یہ عوامی نمائندے بااختیار ہیں۔
پنچایت راج نظام: 73ویں اور 74ویں ترامیم کے نفاذ کی کوششیں 370کو کمزور کرنے کی سازش:ساگر
