سرینگر/ریاست میں سنیچر کو منعقد ہونے والے پنچائتی انتخابات کے آٹھویں مرحلے کے دوران 2633 پولنگ مراکز پر ووٹنگ شروع ہوگئی ہے۔ آج کشمیر صوبے کے550 اور جموں صوبے کے 2083 پولنگ مراکز میں ووٹ ڈالے جارہے ہیں۔ پولنگ کا عمل صبح آٹھ بجے شروع ہو کر2بجے تک جاری رہے گا ۔
سی ای او جے اینڈ کے شالین کابرا کے مطابق 361 پولنگ مراکز کو انتہائی حساس زمرے میں رکھا گیا ہے جن میں سے کشمیر صوبے کے 171 اور جموں صوبے کے 190 پولنگ مراکز شامل ہیں ۔
انہوں نے کہا کہ آٹھویں مرحلے میں 331 سرپنچ اور 2007 پنچ حلقوں کیلئے6340 اُمیدوار میدان میں ہیں جبکہ43 سرپنچوں اور681 پنچوں کو پہلے ہی بلا مقابلہ کامیاب قرار دیا جا چکا ہے ۔
انہوں نے مزید کہا کہ آٹھویں مرحلے کے دوران 515121 ووٹر سرپنچ حلقوں اور 419775 ووٹر پنچ حلقوں کیلئے ووٹ ڈالیں گے ۔ انہوں نے کہا کہ ووٹروں میں پہلے ہی فوٹو ووٹر سلپ تقسیم کئے جا چکے ہیں ۔
