پلہ پورہ سونہ وار کے لوگ پریشان

سرینگر// شہر کے سونہ وار علاقہ کے شہریوں نے پلہ پورہ میں قائم کوڑے دان کو مقامی لوگوں کیلئے باعث نزاع قرار دیتے ہوئے کنٹونمنٹ بورڈ سے مطالبہ کیا ہے کہ مذکورہ کچرہ دان کو ہٹایا جائے۔کنٹونمنٹ بورڈکے وارڈ نمبر4پلہ پورہ سونہ وار میں موجود ایک بڑے کوڑے دان کو ہٹانے کا مطالبہ کرتے ہوئے لوگوںنے کہا کہ اب جب ہر ایک گھر اور گلی کے باہر بورڈنے جدید ڈسٹ بن لگائے ہیںاور ماہانہ فیس کی عوض بورڈ کی طرف سے تعینات اہلکار کوڑا کرکٹ بھی روزانہ بنیادوں پر صاف کر رہے ہیں،اس بڑے کوڑے دان کی ضرورت نہیں ہے۔مقامی شہریوں ہلال احمد، امتیاز اسلم،غلام رسول اور ریاض احمد نے کشمیر عظمیٰ کو بتایا کہ اس ڈسٹ بن کی وجہ سے مقامی لوگوں کو کافی مشکلاتوں کا سامنا کرنا پڑ رہا ہے۔انہوں نے کہا کہ آس پاس علاقوں سے اب کوڑا کرکٹ جمع کر کے اس ڈسٹ بن میں ڈالا جا رہا ہے اور اس کو’کوڑا اور غلاظت‘ جمع کرنے کی مخصوص جگہ میں تبدیل کیا گیا ہے۔مقامی شہریوں کا کہنا ہے کہ آس پاس رہائش پذیر کنبوں کے علاوہ نزدیک میں گورنمنٹ گرلز ہائی اسکول میں زیر تعلیم طالبات کو بھی مذکورہ کوڑے دان کی وجہ سے کافی مشکلات کا سامنا کرنا پڑ رہا ہے کیونکہ گرمیوں میں اس کوڑے دان  سے بدبو اور عفونیت کی وجہ سے بیماریاں پھیلانے کا خدشات لاحق رہتا ہے جبکہ اس کوڑے سے پلنے والے کتوں نے مقامی آبادی کی زندگی کو اجیرن بنا دیا ہے۔مقامی لوگوں نے کنٹونمنٹ بورڈ سے مطالبہ کیا ہے کہ فوری طور پر اس کوڑے دان کو ہٹایا جائے۔