سرینگر/جنوبی کشمیر کے پلوامہ ضلع میں سنیچر کو جنگجوﺅں اور فورسز کے مابین جاری معرکہ آرائی کی جگہ کے آس پاس شدید جھڑپیں شروع ہوئی ہیں۔
یہ معرکہ آرائی حاجن، راجپورہ نامی گاﺅں میں دوران شب شروع ہوئی۔
اطلاعات کے مطابق نوجوانوں کی ایک اچھی خاصی تعداد نے معرکہ کے آس پاس تعینات فورسز اہلکاروں کو شدید سنگباری کا نشانہ بنایا جنہوں نے ٹیر گیس کے گولے داغے اور یوں باضابطہ جھڑپوں کا آغاز ہوگیا جو آخری اطلاعات ملنے تک جاری تھیں۔
اس سے قبل دوران شب حاجن، راجپورہ نامی گاﺅں میں اُس وقت معرکہ آرائی شروع ہوئی جب فورسز نے محاصرے کے بعد گھر گھر تلاشی آپریشن شروع کیا۔
پولیس ذرائع کے مطابق تلاشی آپریشن کے دوران جنگجوﺅں اور فورسز کا آمنا سامنا ہوگیا اور طرفین نے ایک دوسرے پر گولیاں چلائیں۔
اس آپریشن میں فوج، سی آر پی ایف اور ایس او جی اہلکار حصہ لے رہے ہیں جنہوں نے جنگجوﺅں کی موجودگی کی مصدقہ اطلاع کے بعد آپریشن شروع کیا ۔
خبر رساں ایجنسی جی این ایس کے مطابق جاری معرکہ آرائی میں اب تک دو جنگجو جاں بحق ہوگئے ہیں جن کا تعلق جیش محمد نامی عسکری گروہ سے ہے تاہم جاں بحق جنگجوﺅں کی لاشیں ابھی بر آمد نہیں کی گئی ہیں۔
