نئی دہلی//سابق صدر پرنب مکھرجی، آنجہانی موسیقار اور گیت کار بھوپین ہزاریکا اور سماجی خدمت گار ناناجی دیش مکھ کو بھارت رتن سے سرفراز کرنے کا اعلان کیا گیا۔70ویں یوم جمہوریہ کے موقع پر جمعہ کو صدر رام ناتھ کووند نے ان عظیم ہستیوں کو ملک کا اعلی شہری اعزاز دیئے جانے کا اعلان کیا۔بھوپین ہزاریکا اور نانان جی دیش مکھ کو یہ اعزاز پس از مرگ دیا گیا ہے۔گزشتہ تین برسوں سے کسی کو بھی بھارت رتن نہیں دیا گیا ہے۔اس سے پہلے 2015 میں سابق وزیراعظم اٹل بہاری واجپئی اور بنارس ہندو یونیورسٹی کے بانی اور مجاہد آزادی مدن موہن مالویہ کو اس اعلی شہری اعزاز سے سرفراز کیا گیا تھا۔بھوپین ہزاریکا آسام سے یہ اعزازحاصل کرنے والی دوسری شخصیت ہیں۔ ان سے پہلے مجاہد آزادی گوپی ناتھ باردولوئی کو 1999 میں پس از مرگ بھارت رتن دیا گیا تھا۔ پرنب مکھرجی بھارت رتن حاصل کرنے والے ملک کے 6ویں شخص ہیں جو صدر رہ چکے ہیں۔ ان میں سے سروپلی رادھا کرشن اور ڈاکٹر اے پی جے عبدالکلام نے صدر بننے سے پہلے یہ اعزاز حاصل کیا تھا۔یو این آئی
