یو این آئی
ممبئی/بورڈ آف کنٹرول فار کرکٹ ان انڈیا (بی سی سی آئی) نے ہندوستان اور پاکستان کے درمیان بڑھتی ہوئی کشیدگی کے پیش نظر انڈین پریمیئر لیگ (آئی پی ایل) 2025 کے بقیہ میچز کو ایک ہفتے کے لیے ملتوی کر دیا ہے ۔جمعہ کی سہ پہر کو جاری کردہ ایک بیان میں، بی سی سی آئی کے سیکرٹری دیوجیت سائکیا نے کہا کہ آئی پی ایل 2025 کو فوری طور پر ایک ہفتے کے لیے ملتوی کر دیا گیا ہے ۔بی سی سی آئی کے سینئر حکام اور آئی پی ایل گورننگ کونسل نے تمام اہم اسٹیک ہولڈرز کے ساتھ مشاورت کے بعد آئی پی ایل کو ایک ہفتے کے لیے ملتوی کرنے کا فیصلہ کیا ہے ۔ میٹنگ میں آئی پی ایل کے چیئرمین ارون دھومل بھی موجود تھے ۔سائکیا نے کہا کہ متعلقہ حکام اور اسٹیک ہولڈرز کے ساتھ مشاورت کے بعد صورتحال کا جامع جائزہ لینے کے بعد ٹورنامنٹ کے نئے شیڈول اور مقامات کے بارے میں مزید معلومات دی جائیں گی۔لکھنؤ سے موصولہ اطلاع کے مطابق آج وہاں رائل چیلنجرز بنگلور اور لکھنؤ سپر جائنٹس کے درمیان ہونے والے میچ کے ٹکٹوں کی رقم واپس کی جارہی ہے اور اسٹیڈیم کے تمام دروازے بند کردیئے گئے ہیں۔ تمام 10 فرنچائزز اور اہم اسٹیک ہولڈرز کو فیصلے سے آگاہ کر دیا گیا ہے ۔خیال کیا جا رہا ہے کہ یہ فیصلہ کھلاڑیوں کی حفاظت کو مدنظر رکھتے ہوئے کیا گیا ہے ۔ اس سے قبل جمعرات کو دھرم شالہ میں پنجاب کنگز اور دہلی کیپٹلز کے درمیان جاری میچ منسوخ کر دیا گیا تھا۔ میچ کے بعد آئی پی ایل کے چیئرمین ارون دھومل نے کہا تھا کہ بورڈ صورتحال پر گہری نظر رکھے ہوئے ہے اور کوئی بھی حتمی فیصلہ مرکزی حکومت کی مشاورت سے کیا جائے گا۔آئی پی ایل 2025 میں اب تک 58 میچ کھیلے جا چکے ہیں جن میں دھرم شالہ میں ہونے والے میچ کی منسوخی بھی شامل ہے ۔ گروپ مرحلے میں 12 میچز باقی ہیں۔
