عظمیٰ نیوزسروس
نئی دہلی//وزیر دفاع راج ناتھ سنگھ نے جمعہ کو کہا کہ پاکستان کو واضح طور پر سمجھنے کی ضرورت ہے کہ دہشت گردی کا وہ “خطرناک کھیل” جو وہ ہندوستان کے خلاف آزادی کے بعد سے کھیل رہا ہے،ختم ہوچکا ہے۔گوا کے قریب طیارہ بردار بحری جہاز INS وکرانت پر بحریہ کے جنگجوؤں کے ساتھ بات چیت میں سنگھ نے اسلام آباد کو ایک سخت انتباہ بھیجا کہ ہندوستان دہشت گردی سے نمٹنے کے لیے ایسے طریقے استعمال کرنے میں ہچکچاہٹ محسوس نہیں کرے گا جن کے بارے میں پاکستان سوچ بھی نہیں سکتا۔انہوں نے کہا کہ آپریشن سندور صرف ایک فوجی کارروائی نہیں ہے بلکہ دہشت گردی کے خلاف بھارت کا اگلا حملہ ہے۔انہوں نے کہا کہ ہم دہشت گردی کے خلاف ہر وہ طریقہ استعمال کریں گے جس کے بارے میں پاکستان سوچ سکتا ہے لیکن ہم ان طریقوں کو استعمال کرنے سے نہیں ہچکچائیں گے جن کے بارے میں پاکستان سوچ بھی نہیں سکتا۔وزیر دفاع نے کہا کہ یہ پاکستان کے مفاد میں ہوگا کہ وہ اپنی سرزمین پر سرگرم ’’دہشت گردی کی نرسریوں‘‘ کو جڑ سے اکھاڑ پھینکے۔انہوں نے کہا “پاکستانی سرزمین سے کھلے عام بھارت مخالف سرگرمیاں کی جا رہی ہیں۔ بھارت سرحد اور سمندر کے اس طرف اور دوسری طرف دہشت گردوں کے خلاف کسی بھی قسم کی کارروائی کرنے کے لیے مکمل طور پر آزاد ہے‘‘۔انہوں نے کہا کہ آج پوری دنیا دہشت گردی کے خلاف اپنے شہریوں کی حفاظت کے ہندوستان کے حق کو تسلیم کر رہی ہے، آج دنیا کی کوئی طاقت ہندوستان کو اس کام سے نہیں روک سکتی۔سنگھ نے آپریشن سندور کے دوران ہندوستانی بحریہ کے کردار کو بھی سراہا۔انہوں نے کہا کہ ہندوستانی بحریہ نے اپنی خاموش خدمات سے ہر ہندوستانی کو متاثر کیا ہے۔ خاموش رہ کر ہندوستانی بحریہ نے پاکستانی فوج کو باندھ کر رکھنے میں کامیابی حاصل کی۔انہوں نے کہا کہ جب ہندوستانی فضائیہ نے پاکستانی سرزمین پر دہشت گردوں کے ٹھکانوں کو تباہ کیا تو بحیرہ عرب میں ہندوستانی بحریہ کی جارحانہ تعیناتی نے پاکستانی بحریہ کو اپنے ساحلوں تک محدود کردیا۔مجموعی آپریشن کے بارے میں، انہوں نے کہا کہ “ہماری سٹرائک اتنی طاقتور تھی کہ پاکستان نے پوری دنیا سے بھارت کو روکنے کی التجا شروع کردی‘‘۔ انہوں نے کہا کہ بہت کم وقت میں ہم نے پاکستان کے دہشت گردوں کے ٹھکانوں اور اس کے عزائم کو تباہ کر دیا۔ انہوں نے کہا کہ ہماری مسلح افواج نے جس رفتار، گہرائی اور وضاحت کے ساتھ کارروائی کی وہ قابل ذکر ہے۔وزیر دفاع نے کہا کہ آپریشن سندور نے نہ صرف دہشت گردوں کو بلکہ ان کے سرپرستوں کو بھی ایک واضح پیغام بھیجا جو ان کی پرورش کرتے ہیں۔انہوں نے مزید کہا کہ ہم نے اپنی شرائط پر اپنی فوجی کارروائیوں کو روکا۔
