ملی ٹینٹ عناصر اور معاونین پر سخت کارروائی کی ضرورت:لیفٹیننٹ گورنر
عظمیٰ نیوز سروس
سرینگر// لیفٹیننٹ گورنر منوج سنہا نے ہفتے کو سرینگر میں درگاہ حضرت بل میں گیسٹ ہاس کا سنگ بنیاد رکھنے کے موقعہ پر کہا کہ، پچھلے کچھ سالوں میں، زائرین کے لیے بنیادی سہولیات میں زبردست بہتری دیکھی گئی ہے اور بنیادی ڈھانچے کی ترقی نے ایک قابل احترام روحانی مرکز حضرت بل کی زیارت کو آسان بنا دیا ہے۔ اپنے خطاب میں لیفٹیننٹ گورنر نے عوام سے مطالبہ کیا کہ وہ اس بات کو یقینی بنائیں کہ ہم معاشرے کو ملی ٹینٹوں کی مدد کرنے والے عناصر سے نجات دلائیں، عوام میں چھپے ملی ٹینٹ عناصر کو انصاف کے کٹہرے میں لائیں اور عوام کی ترقیاتی ضروریات کو پورا کرنے کے لیے انفراسٹرکچر اور دیگر منصوبوں کو ایک نئی تحریک دی جائے۔پہلگام میں پاکستان کے زیر اہتمام ملی ٹینٹوں کے ہاتھوں مارے گئے معصوم شہریوں کو خراج عقیدت پیش کرتے ہوئے، لیفٹیننٹ گورنر نے کہا، آپریشن سندورنے پاکستان کو سزا دے کر پہلگام حملے کا بدلہ لیا اور دہشت گردی کے تئیں ہندوستان کی زیرو ٹالرنس پالیسی کو مضبوطی سے نافذ کیا۔انہوں نے کہا کہ ہماری مسلح افواج کے بہادر جوانوں نے نہ صرف پاکستان کے اندر ملی ٹینٹوں کے کارخانوں کو تباہ کیا بلکہ ایک نئی سرخ لکیر بھی کھینچ دی ہے۔ انہوں نے مزید کہا کہ اب کسی بھی ملی ٹینٹ حملے کو ‘جنگ کا عمل’ تصور کیا جائے گا اور پاکستان کو اس کی سخت ترین سزا دی جائے گی۔ایل جی نے کہا”ہمیں ملی ٹینسی کے ماحولیاتی نظام پر سخت حملہ کرنے کی ضرورت ہے۔ ملی ٹینٹوں کے معاونین کی شناخت کی جانی چاہئے اور انہیں جموں و کشمیر کی روح کو زخم دینے کے لئے ملی ٹینٹ کی طرح سزا دی جانی چاہئے‘‘۔ لیفٹیننٹ گورنر نے کہاکہ پہلگام حملے کے بعد پاکستان کے خلاف جموں و کشمیر کی سڑکوں پر جس طرح کے احتجاج دیکھنے میں آئے وہ تاریخی تھے۔ وادی ملی ٹینسی کے خلاف نعروں سے گونج اٹھی۔لیفٹیننٹ گورنر نے ایک بھارت شریشٹھ بھارت کے جذبے کو پروان چڑھانے اور متنوع برادریوں میں اتحاد کو فروغ دینے کے لیے اجتماعی کوششوں پر زور دیا۔ انہوں نے کہا کہ مہمان جموں و کشمیر کی ثقافت کو خراب کر رہے ہیں یا آبادیاتی یلغار واقعی مسائل کا باعث ہیں ،عوام کو ایسے بیانات کی مخالفت کرنی چاہیے۔لیفٹیننٹ گورنر نے کہا”میں جموں کشمیر میں ذمہ داری کے عہدوں پر فائز لوگوں سے اپیل کرتا ہوں کہ وہ مقامی اور غیر مقامی جیسے جملے کا استعمال بند کریں، ہم سب ہندوستانی ہیں، ہندوستانیوں کو مقامی اور باہر کے لوگوں میں تقسیم کرنا بند کریں۔ آپ لوگوں کو متحد کرنے کے لئے کام کریں تاکہ ایک متحد معاشرہ جموں کشمیر کو ترقی کی بلندیوں پر لے جا سکے۔” ۔لیفٹیننٹ گورنر نے دعا کی کہ پیغمبر اسلامؐ، اوربابا امرناتھ اپنی رحمتیں نازل کریں اور معاشرے میں محبت، امن اور بھائی چارے کو مضبوط کریں۔
