ایم ایم پرویز
رام بن//ملی ٹینسی سے نمٹنے کےلئےرامبن پولیس نے ایک ملی ٹینٹ کی غیر منقولہ جائیداد (زمین) کو ضبط کر لیا جو اصل میں رام بن کے بانہال علاقے سے تعلق رکھتا ہے اور اس وقت پاکستان میں آباد ہے۔یہ جائیداد رام بن ضلع کے پولیس سٹیشن بانہال کے دائرہ اختیار میں سیکشن 83 سی آر پی سی کے تحت منسلک کی گئی ۔سینئرسپرنٹنڈنٹ آف پولیس رامبن، کلبیر سنگھ نے کہا کہ پاکستان سے کام کرنے والے حزب المجاہدین تنظیم سے وابستہ ایک ملی ٹینٹ کی جائیداد ضبط کی گئی ہے۔انہوں نے کہا کہ کل ایک کنال اور پانچ مرلہ اراضی (زرعی زمین) جو کہ پانچ مختلف خسرہ نمبروں کے تحت محمد سلیم کے نام پر گاؤں تکیہ، تیتھر تحصیل بانہال ضلع رام بن میں رجسٹرہے۔ایس ایس پی نے بتایا کہ یہ نواں کیس ہے جس میں ملی ٹینٹوں کی جائیدادیں ضبط کی گئیں۔پولیس کے مطابق محمد سلیم ولد عبدالحنی کے خلاف مقدمہ ایف آئی آر نمبر 101زیر دفعہ 436 آر پی سی اور دفعہ 3/4ٹاڈا تھانہ بانہال میں سال 1992میں پولیس سٹیشن بانہال میں درج کیا گیا تھا اور قانونی کارروائی سے بچنے کی غرض سے جرم کرنے کے بعد مفرور ہے۔تیسری ایڈیشنل سیشن کورٹ جموں نے بھی انہیں اشتہاری قرار دیتے ہوئے جائیداد ضبط کرنے کا حکم دیا ہے۔پولیس نے کہا کہ اٹیچمنٹ کیس ایف آئی آر نمبر 101آف 1992سے منسلک ہے ایک پراپرٹی کو پولیس ٹیم اور ایک ایگزیکٹیو مجسٹریٹ کی موجودگی میں منسلک کیا گیا، جس میں بدھ کو قانونی طریقہ کار کی مکمل تعمیل کو یقینی بنایا گیا تھا۔ایس ایس پی کلبیر سنگھ نے مزید کہا کہ رام بن پولیس دیگر ایجنسیوں کے ساتھ مل کر قوم کی خودمختاری اور سالمیت کو خطرے میں ڈالنے والی سرگرمیوں میں ملوث افراد اور اداروں کے خلاف سخت کارروائی کرنے کے اپنے مشن میں پرعزم ہے۔
