پاکستان جموں و کشمیر میں امن نہیں چاہتا: دلباغ سنگھ

بلال فرقانی
سرینگر//جموں و کشمیر پولیس کے ڈائریکٹر جنرل دلباغ سنگھ نے اتوار کو کہا کہ پاکستان نہیں چاہتا کہ جموں و کشمیر میں امن قائم ہو۔انہوں نے کہا”پاکستان اور اس کی ایجنسیوں نے ہمیشہ جموں و کشمیر میں تشدد کا کھیل کھیلا ہے اور وہ ہمارے خطے میں امن کو پسند نہیں کرتے”۔ بی این ملک میموریل آل انڈیا پولیس فٹ بال چیمپئن شپ کی افتتاحی تقریب کے موقع پر انہوں نے کہا کہ پاکستان اور اس کی ایجنسیاں جموں و کشمیر میں دہشت گردی اور منشیات کی روک تھام اور حمایت کر رہی ہیں۔ڈی جی پی سنگھ نے کہا کہ پاکستان نہ صرف منشیات اور اسلحہ اور گولہ بارود کی نقل و حمل کرتا ہے بلکہ خطے میں عسکریت پسندی پھیلانے کے لیے سرحد پار سے بھاری مقدار میں نقدی بھی بھیجی جا رہی ہے۔انہوں نے مزید کہا کہ میں جموں و کشمیر کے نوجوانوں کو یہ باور کرانا چاہتا ہوں کہ پاکستان کی سازشوں کو روکنے اور امن اور خوشحالی کے بندھنوں کو مضبوط کرنے کا وقت آگیا ہے۔ٹارگٹ کلنگ کے حوالے سے ڈی جی پی نے کہا کہ ’’ان میں معمولی کمی آئی ہے لیکن کہیں کہیں ایسے واقعات رونما ہوتے ہیں اور سیکورٹی ایجنسیاں سختی سے جانچ کر رہی ہیں اور دہشت گردی کو سرزمین سے مکمل طور پر ختم کرنے کے لیے مؤثر اقدامات کیے جا رہے ہیں،‘‘ انہوں نے کہا “دن رات کوششیں جاری ہیں اور مقصد کے حصول کے لیے جاری رہیں گی”۔ دلباغ سنگھ نے کہا کہ جیسے ہی برف پگھلنا شروع ہوتی ہے دراندازی کے امکانات بڑھ جاتے ہیں۔انہوں نے کہا کہ اب تک سرحد پار سے ہونے والی دراندازی پر کافی حد تک قابو پا لیا گیا ہے۔انہوں نے کہا کہ مکمل چھان بین کے بعد ملوث افراد کی جائیدادیں قرق کی جا رہی ہیں۔ “یہ ڈرامہ نہیں ہے جو کھیلا جا رہا ہے.. جو بھی عسکریت پسندوں کو جان بوجھ کر پناہ دینے میں ملوث پایا جاتا ہے، جائیدادیں سیل کی جا رہی ہیں”۔انہوں نے کہا کہ لوگوں کو متعدد بار متنبہ کیا گیا ہے کہ وہ کسی بھی عسکریت پسند کو پناہ یا ٹرانسپورٹ فراہم نہ کریں۔ انہوں نے سوال کیا کہ ’’اگر سیکورٹی ایجنسیاں کسی ایسی جائیداد کو ضبط کر رہی ہیں جہاں دہشت گردی کی کارروائیاں ہو رہی ہیں تو یہ غلط ہے‘‘۔انہوں نے کہا کہ جو لوگ عسکریت پسندوں کو ان کے مذموم عزائم میں مدد فراہم کرنے کے مجرم پائے جائیں گے انہیں بخشا نہیں جائے گا۔