کارڈف/ پاکستان اور سری لنکا اپنے سے اونچی رینکنگ کے حریفوں کو شکست دینے کے بعد پیر کو جب آئی سی سی چمپئنز ٹرافی کے اپنے آخری گروپ بی مقابلے میں اتریں گے تو ان کے لئے یہ دن 'جج منٹ ڈے ' ہوگا۔پاکستان اور سری لنکا کے درمیان اس مقابلے کی فاتح ٹیم چمپئنز ٹرافی کے سیمی فائنل میں پہنچ جائے گی اور ہارنے والی ٹیم ٹورنامنٹ سے باہر ہو جائے گی۔ دونوں ٹیموں نے اپنا پہلا مقابلہ بری طرح گنوانے کے بعد شاندار واپسی کی۔ پاکستان کو اپنے پہلے میچ میں دیرینہ حریف ہندوستان سے 124 رن سے شرمناک شکست کا سامنا کرنا پڑا تھا لیکن عالمی رینکنگ کی آٹھویں نمبر کی ٹیم پاکستان نے اس کے بعد اپنی بہترین گیندبازی سے دنیا کی نمبر ایک ٹیم جنوبی افریقہ پر جیت درج کی۔سری لنکا کو جنوبی افریقہ نے بری طرح ہرایا تھا لیکن سری لنکا کی ٹیم نے دنیا کی نمبر دو ٹیم اور دفاعی چمپئن ہندوستان کے 321 رنز کے مضبوط اسکور کو آسانی سے حاصل کر لیا تھا۔ الٹ پھیر کر چکی یہ دونوں ٹیمیں مقابلے میں برقرار رہنے کے لئے ہر حال میں جیت درج کرنے کی ہرممکن کوشش کریں گی۔ دونوں ہی ٹیموں نے اس کے لئے کمر کس لی ہے ۔ایک طرف پاکستان کی گیندبازی اچانک مضبوط نظر آنے لگی ہے تو دوسری طرف سری لنکا کی بلے بازی میں بھی طاقت آئی ہے ۔یعنی مقابلہ مکمل طور پر چیلنجنگ رہے گا۔سری لنکا کے لئے کپتان انجیلو میتھیوز کو چوٹ سے نجات حاصل کرنا ٹیم کے لئے فائدہ مند ثابت رہا جنہوں نے بطور کپتان پوری ذمہ داری سے کھیلتے ہوئے ناٹ آوٹ 52 رنز بنا کر ہندوستان کے 321 رن کے اسکورکا آسانی سے دفاع کیا ۔ میتھیوز کے علاوہ دانشکا گناتلکے نے 76 اور کشل مینڈس نے ناٹ آؤٹ 89 رن کی ذمہ دارانہ والی اننگز کھیلی۔سری لنکا کو اگرچہ اس اہم مقابلے سے پہلے ایک جھٹکا ضرور لگا ہے ۔ اس کے بلے باز کشل پریرا ہیمسٹرنگ چوٹ کی وجہ سے ٹورنامنٹ سے باہر ہو گئے ہیں۔ پریرا کی جگہ سلامی بلے باز دھننجے ڈی سلوا کو سری لنکا کی ٹیم میں شامل کیا گیا ہے ۔بین الاقوامی کرکٹ کونسل (آئی سی سی) نے کہا کہ ٹورنامنٹ کی تکنیکی کمیٹی نے کشل پریرا کی جگہ دھننجے ڈی سلوا کو سری لنکا ئی ٹیم میں شامل کرنے کی اجازت دے دی ہے ۔ 25 سالہ ڈی سلوا نے اب تک 16 ون ڈے میچوں میں 334 رن بنانے کے علاوہ چار وکٹ بھی حاصل کئے ہیں۔سری لنکا کی ٹیم کے لئے تشویش کی بات اس کی گیندبازی ہے جس کی جنوبی افریقہ اورہندوستان کے خلاف دونوں میچوں میں جم کر پٹائی ہوئی ہے ۔
پاکستان بمقابلہ سری لنکا
