عظمیٰ نیوز سروس
جموں//لیفٹیننٹ گورنر منوج سنہا نے پاکستان کو ایک “ناکام ریاست” قرار دیتے ہوئے،کہا کہ وہ مرکز کے زیر انتظام علاقے میں ملی ٹینوں کو بھیج کر جموں و کشمیر میں امن اور معمول کو خراب کرنے کی مسلسل کوشش کرتا ہے۔انہوں نے لوگوں پر زور دیا کہ وہ پولیس کو معاشرے میں ایسے افراد کے بارے میں مطلع کریں جو امن اور عوامی بہبود کے خلاف ہیں۔سنہا نے بھدرواہ میں ایک تقریب میں کہا، جب بھی یہاں امن قائم ہوتا ہے، ہمارے پڑوسی کے پیٹ میں درد ہونے لگتا ہے۔ انہوں نے کہا کہ پولیس اور سیکورٹی فورسز نے انتظامیہ کے ساتھ مل کر ملی ٹینسی کو ختم کرنے کے لیے آپریشن شروع کیا ہے، لیکن پاکستان جموں و کشمیر میں امن کو خراب کرنے کی اپنی کوششیں جاری رکھے ہوئے ہے۔ایل جی نے کہا کہ پاکستان اپنے اندرونی مسائل سے دوچار ہے۔ انہوں نے کہا کہ “ہم سب جانتے ہیں کہ یہ ایک ناکام ریاست ہے، یہ اپنے شہریوں کو بنیادی سہولتیں بھی فراہم نہیں کر سکتی۔ پھر بھی، یہ مسلسل ملی ٹینٹوںکو یہاں بھیج کر جموں و کشمیر میں امن کو خراب کرنے کی کوشش کرتی ہے۔”سنہا نے زور دے کر کہا کہ امن کے بغیر ترقی نہیں ہو سکتی۔ انہوں نے کہا کہ معاشرے میں کچھ لوگ ملی ٹینٹوں کو پناہ دیتے ہیں اور ان کی نقل و حرکت میں سہولت فراہم کرتے ہیں۔انہوں نے کہا”میں ان سے اپیل کرنا چاہتا ہوں،جب کہ امن قائم رکھنا سیکورٹی فورسز اور انتظامیہ کی ذمہ داری ہے، اگر آپ میں سے کوئی ایسے عناصر کی حمایت کر رہا ہے، تو یہ آپ کا فرض ہے کہ انہیں ڈھال نہ دیں بلکہ پولیس کو اطلاع دیں۔”انہوں نے مزید کہا کہ جب تک ملی ٹینسی کا مکمل خاتمہ نہیں ہو جاتا، ہمارے پولیس اہلکار، سکیورٹی فورسز اور انتظامیہ آرام سے نہیں بیٹھیں گے۔انہوں نے کہا”اس مہم میں، میں آپ کا تعاون چاہتا ہوں، میں یہ بار بار کہتا ہوں – جموں و کشمیر کا صرف ایک ہی منتر ہونا چاہیے: ‘بے گناہوں کو ہاتھ نہ لگائیں، لیکن قصورواروں کو نہ چھوڑیں۔ میں دہراتا ہوں کہ کسی بے گناہ کو نقصان نہیں پہنچانا چاہیے، لیکن جس نے جرم کیا ہے اسے سزا ملنی چاہیے۔”
