پاکستان ایک محفوظ ملک ہے، گگز کا دنیا کو پیغام

لاہور/ مانچسٹر یونائیٹڈ اور انگلینڈ کے سابق اسٹار فٹبالر ریان گگز نے کہا ہے کہ نمائشی میچز سے دنیا کو یہ پیغام گیا کہ پاکستان ایک محفوظ ملک ہے۔لاہور کے فورٹریس اسٹیڈیم میں ہونے والے میچ سے قبل پریس کانفرنس سے خطاب کرتے ہوئے عالمی شہرت یافتہ سابق فٹبال نے کہا کہ ہم یہاں آ کر بہت خوش ہیں اور امید کرتے ہیں کہ ہم دنیا کو یہ پیغام پہنچانے میں کامیاب رہیں گے کہ پاکستان ایک اچھا اور محفوظ ملک ہے۔انہوں نے مزید کہا کہ کھلاڑی پاکستان عوام کی جانب سے کی گئی مہمان نوازی سے بہت زیادہ خوش ہیں۔یاد رہے کہ عالمی شہرت یافتہ سابق فٹبالر ملک میں فٹبال کے کھیل کو ترقی دینے اور مقامی فٹبالرز کی حوصہ افزائی کیلئے لیڑر لیگ میں حصہ لینے کیلئے آئے ہیں جہاں کراچی اور لاہور میں دو نمائشی میچز کا انعقاد کیا جائے گا۔پاکستان میں لیڑر لیگ میں حصہ لینے والے بین الاقوامی کھلاڑیوں کو 'رونالڈینیو اینڈ فرینڈز' کا نام دیا گیا ہے جن میں مانچسٹریونائیٹڈ کے سابق کھلاڑی رائن گگز، انگلینڈ کے سابق گول کیپر ڈیوڈ جیمز، ڈچ کھلاڑی جارج بوئٹنگ، فرانس کے سابق کھلاڑی رابرٹ پائرس اور نیکولس اینلکا اور پرتگال کے سابق اسٹار لوئس با مورٹے شامل ہیں۔ہفتے کو کراچی میں کھیلے گئے میچ کو دیکھنے کے لیے مداحوں کی ایک بڑی تعداد میدان میں موجود تھی جس میں رونالڈینیو7 کی ٹیم نے ریان گگز کے خلاف 1-2 سے کامیابی حاصل کی۔ریان گگز کا کہنا تھا کہ میرے خیال میں پاکستان میں فٹبال کی بہتری کیلئے ملک میں موجود فٹبال حکام کو انفرا اسٹرکچر پر توجہ دیتے مقامی کھلاڑیوں کیلئے بہترین تربیت یافتہ کوچز کا تقرر کرنا چاہیے۔ایک سوال کے جواب میں ان کا کہنا تھا کہ کراچی کے عبدالستار ایدھی اسٹیڈیم میں کھیلے گئے نمائشی میچ میں انہوں پاکستان کے باصلاحیت کھلاڑیوں کی قابلیت کا مشاہدہ کیا جو اپنے کھیل میں بہتری کے خواہشمند نظر آئے۔’پاکستان میں ٹیلنٹ بہت ہے لیکن انفرااسٹرکچر کی ضرورت ہے تاکہ اس ٹیلنٹ کو پروان چڑھایا جا سکے۔ میں نے پاکستان کے نوجوان بچوں میں فٹبال کا حد سے زیادہ جنون دیکھا‘۔ادھر ہفتے کو ہونے والے میچ میں انجری کے سبب ریان گگز شاید آج ہونے والے میچ میں حصہ نہیں لے سکیں تاہم اس حوالے سے حتمی فیصلہ میچ سے قبل کیا جائے گا۔