ریاض//سعودی عرب کی شاہی برّی افواج اور پاکستان آرمی کی مشترکہ جنگی مشقیں الصمصام ششم ختم ہوگئی ہیں۔یہ مشقیں تین ہفتے تک جاری رہی ہیں اور ان کے دوران میں سعودی شاہی بری فوج اور پاک آرمی کے دستوں نے جدید ہتھیار چلانے، طیاروں اور ہیلی کاپٹروں سے دوران پرواز کودنے، باردوی سرنگوں اور دھماکا خیز مواد کو ناکارہ بنانے، چھاپا مار کارروائیوں اور لڑاکا دستوں نے حالتِ جنگ میں گشت کی سرگرمیوں میں حصہ لیا ہے۔ان فوجی مشقوں کے اختتام پر جاری کردہ ایک بیان میں کہا گیا ہے کہ ’’الصمصام ششم میں دونوں فوجوں کی جنگی تیاریوں، صلاحیت اور پیشہ واریت کی عکاسی ہوئی ہے۔ ان کا کمان اور کنٹرول کے تصور کی مضبوطی اور فعالیت کے ذریعے جائزہ لیا گیا ہے۔ مشقوں میں شریک دستوں نے اپنے اہداف کو ٹھیک ٹھیک نشانہ بنایا ہے اور دو نوں پارٹیوں میں مکمل ہم آہنگی دیکھنے میں آئی ہے‘‘۔بیان کے مطابق مشقوں کی اختتامی ڈرل کامیابی سے وقوع پذیر ہوئی ہے۔اس کے دوران میں مقرر کردہ اہداف حاصل کر لیے گئے ہیں۔مشقوں کی اختتامی تقریب میں پاکستان آرمی کی تیسویں کور کے کمانڈنگ آفیسر لیفٹیننٹ جنرل اکرام الحق ،سعودی عرب کی شاہی بری افواج کے ڈپٹی کمانڈر میجر جنرل احمد بن عبدالرحمان الشہری اور دونوں ممالک کی مسلح افواج کے دوسرے متعدد سینیر کمانڈنگ افسر بھی موجود تھے۔اس موقع پر میجر جنرل الشہری نے اپنی تقریر میں پاکستان کی حکومت اور آرمی کا سعودی عرب کی شاہی برج فوج کے دستوں کی شاندار میزبانی اور استقبال پر شکریہ ادا کیا۔ انھوں نے مشقوں کے تمام مراحل میں حصہ لینے والے افسروں اور نوجوانوں کی پیشہ ورانہ صلاحیت اور لگن کو سراہا اور کہا کہ ان مشقوں سے سعودی عرب کی زمینی افواج کو اپنی جنگی صلاحیتوں کو بہتر اور مؤثر بنانے کا موقع ملا ہے۔
پاکستان اور سعودی عرب کی مشترکہ فوجی مشقوں ’’الصمصام ششم‘‘ کا اختتام
