پچھلے پانچ سال کے دوران بھی وادیٔ کشمیر کے بیشتر علاقوں میں لوگ پینے کے پانی کی قلت اور مسلسل نایابی کے خلاف آواز بلند کرتے چلے آرہے ہیں اور مضر صحت اور ناصاف پانی کے استعمال سے متاثرہونے والی انسانی صحت کے خلاف مختلف صورتوں میں اپنی ناراضگی بھی ظاہر کرتے آرہے ہیں لیکن پھر بھی اُنہیں درپیش یہ بنیادی سنجیدہ مسئلہ حل نہیں ہوپارہا ہے۔یو ٹی سرکار کی طرف سے اگرچہ بار بار یہ دعویٰ دہرایا جارہا ہے کہ جموں و کشمیرکے ہر گھر میں نل اور جل پہنچایا جارہا ہے لیکن زمینی سطح پر یہ دعویٰ صحیح ثابت نہیں ہورہا ہے ۔بے شک بیشتر علاقوں میں نل تو پہنچائے گئے ہیں لیکن اُن میں جل نہیں آرہا ہےاور نہ ہی اس مسئلے کو دور کرنے یا اس پر قابو پانے کے لئے کوئی موثر کوشش کی جارہی ہے۔جس کے نتیجے میں یہ مسئلہ دن بہ دن پیچیدہ ہوتا چلا جارہا ہے،خصوصاً موسم گرما میں یہ مسئلہ شدید بحرانی شکل اختیار کر جاتا ہے۔بغور دیکھا جائےتو وادی میں پینے کے صاف پانی کی بحرانی صورت حال کوئی خلاف توقع بات قرار نہیں دی جارہی ہے کیونکہ سبھی اس بات سے بخوبی واقف ہیں کہ انسانی آبادی میں دن بہ دن اضافہ ہورہا ہے اور گذشتہ تین دہائیوں کے دوران جہاں سرینگر شہر کی آبادی میں تین گنا اضافہ ہوگیا ہے وہیں تقریباً سبھی اضلاع کے بیشتر علاقوں کی آبادی بھی دوگنی یا اس سے زیادہ ہوچکی ہے،جبکہ لاکھوں کی تعداد میں فوج اور حفاظتی فورسز کی موجودگی اور ساتھ ہی غیر ریاستی باشندوں کی بھرمار اس کے علاوہ ہے۔
چونکہ پینے کا پانی انسانی زندگی کا انتہائی اہم اور لازمی جُز ہے اور ہَوا کے بعد پانی پر ہی انسانی وجود قائم رہ سکتا ہے ،تو ظاہر ہے کہ وادی کشمیر میں آبادی میں اضافے کے ساتھ ساتھ پینے کے پانی کی ضرورت اور وسیع پیمانے پر اس کا تصرف بھی کافی حد تک بڑھ گیا ہے۔گوکہ وادی کشمیر پینے کے پانی کے ذخائر سے مالا مال قرار دی جارہی ہے لیکن ان ذخائر کو بچانے اور انہیں انسانی زندگی کے لئے کار آمد بنانے کی کوئی کوشش نہیں کی گئی ہے۔صارفین پانی کے اضافے کے پیش نظر پینے کے پانی کی بڑھتی ہوئی ضروریات کا حساس معاملہ یہاں کی حکومتوں نے ہمیشہ پسِ پُشت ڈال دیا اور کسی بھی حکمران کی طرف سے اس سلسلے میں اپنی ذمہ داریاں نبھانے کی ایماندارانہ کوشش نہیں ہوئی ہے۔پینے کا پانی فراہم کرنے کے لئے کوئی قابل ذکر پروجیکٹ تعمیر نہیں کیا گیا ،البتہ پچھلی پانچ دہائیوں کے دوران جو کوئی بھی پروجیکٹ شروع کیا گیا، اس کے لئے وقف کی گئی رقومات کا زیادہ تر حصہ وزراء،افسروں، انجینئر وںاور انجینئرنگ شعبے سے وابستہ سرکاری ملازموں اور ٹھیکیدار وں کی ہی نذر ہوکر رہ گیا۔چنانچہ پانچ سال قبل جب جموں وکشمیر میںسیاسی جماعتوں کی کایا پلٹ ہوگئی اور یہاں یوٹی سرکار نے اقتدار ی نظام سنبھالا تو لوگوں کو یقین دلایا گیا تھا کہ اُن کے تمام بنیادی مسائل دور کرنے کی ہر ممکن کوشش کی جائے گی لیکن تاحال موجودہ سرکاری انتظامیہ بھی عوام کو درپیش مسائل دور کرنے میں کامیاب ثابت نہ ہوسکی ہے۔
ان پانچ برسوں کے دوران بھی وادی میں پینے کے پانی کی قلت اور عدم دستیابی نہ صرف برقرار رہی بلکہ بعض اوقات شدت کی شکل اختیا ر کرگئی،جس کے باعث بیشتر اضلاع کے لوگ ندی نالوں کا ناصاف اور آلودہ پانی استعمال کرنے پر مجبور ہوتے رہے اور بیماریوں کو گلے لگانے پر مجبور ہوئے۔ندی نالوں کے ناصاف اور آلودہ پانی نے کئی انسانی جانیں بھی لیں،نیزدوردراز دیہی علاقوں کے بیشتر لوگ معدے اور انتڑیوں کی بیماریوں کے بھی شکار ہوگئے،اس کے باوجود ابھی تک اُنہیں پینے کے صاف پانی مہیا نہیں ہورہا ہے۔اس وقت بھی جو خبریں اخبارات کی زینت بنتی ہیں ،اُن کے مطابق مختلف علاقوں میں پینے کے پانی کی قلت دور نہیں کی جارہی ہےجبکہ مسلسل عدم دستیابی کے باعث آج بھی لوگوں کو ناصاف اور آلودہ پانی استعمال کرنے پر مجبور ہونا پڑرہا ہے۔الغرض پینے کے صاف پانی کی قلت اور عدم دستیابی کی جو صورت حال عرصۂ دراز سے چلی آرہی ہے، وہ بیشتر علاقوں میں آج بھی موجود ہےاور یہ مسئلہ نہ صرف مختلف اضلاع کے بیشتر علاقوں کو درپیش ہے بلکہ شہری آبادی میں بھی یہ مسئلہ پیچیدہ ہوتا چلا جارہا ہے۔بہر صورت موجودہ سرکاری انتظامیہ کو اس معاملے میں سنجیدگی کے ساتھ غورو فکر کرنے کی ضرورت ہے اور فوری طور ایسے ٹھوس اقدامات اُٹھانے کی ضرورت ہے کہ جن سے آنے والی گرمیوں کے ایام میں لوگوں کو پینے کا صاف پانی مہیا ہوسکے۔ورنہ دن بہ دن بڑھتی ہوئی پینے کے پانی کی قلت اور ناصاف پانی کے استعمال سے پیدا ہونے والے محرکات سے یہ اندازہ لگانا مشکل نہ ہوگا کہ موجودہ حکومت کے انتظامی امور کا نظام کس قدر ابتر ہے اور متعلقہ محکمہ اپنی ذمہ داریوں سے کتنا غافل ہے۔
