پاندان نوہٹہ آتشزدگان میں امداد تقسیم

سرینگر// دارالخیر میرواعظ منزل نے گزشتہ دنوں پاندان نوہٹہ سرینگر میں بھیانک آتشزدگی کے نتیجے میں3 رہائشی مکان اور املاک و جائیداد کے نقصانات پر رنج و غم کا اظہار کرتے ہوئے متاثرین کے ساتھ دلی ہمدردی اور یکجہتی کا اظہار کیا اور متاثرین کی باز آبادکاری اور امداد کی ضرورت پر زور دیا ہے۔اس بیچ دارالخیر میرواعظ منزل سرینگر کے نظر بند رکھے گئے سرپرست اعلیٰ میرواعظ عمرفاروق کی ہدایت پر وفد، جس کی قیادت دارالخیر کے رکن مفتی غلام رسول سامون کررہے تھے، نے پاندان نوہٹہ سرینگر جاکر3 متاثرہ کنبوں میں چاول، آٹا، کمبل اور کچن کٹ (Kitchen kit) وغیرہ اور بنیادی ضروریات کی چیزیں فراہم کیں اور ان کے ساتھ دارالخیر کی جانب سے ہمدردی اور یکجہتی کا اظہار کیا۔اس موقعہ پر دارالخیر میرواعظ منزل نے یہ بات پھر دہرائی ہے کہ ملت کشمیر اس حقیقت سے باخبر ہے کہ دارالخیر میرواعظ منزل اپنے قیام کی مدت سے لیکر آج تک برابر اپنے مخلصین کی مالی اور جنسی معاونت سے برا بر آفات سماویہ و ارضیہ کے دوران بلا امتیاز مذہب و ملت متاثرین کی حتی المقدور امداد اور بحالی کیلئے کوششوں میں مصروف عمل ہے۔اس ضمن میں دارالخیر میرواعظ منزل نے اہل ثروت حضرات سے ماضی کی طرح اس ملی ادارے کی ہر ممکن مدد اور معاونت کی اپیل دہرائی ہے تاکہ امدادی کام جاری رکھا جاسکے۔