ٹی ٹونٹی ورلڈ کپ: : آئی سی سی کی طرف سے شیڈول کا اعلان

نئی دہلی// کرکٹ کے دو روایتی حریف ہندستان اور پاکستان 2011 ورلڈ کپ کے بعد پہلی بار کسی آئی سی سی ٹورنامنٹ کے گروپ مرحلے میں آپس میں نہیں کھیلیں گے ۔ سال 2020 میں ہونے والے ٹوئنٹی -20 ورلڈ کپ کے گروپ مرحلے میں ہندستان اور پاکستان کا آمنا سامنا نہیں ہو گا۔ سال 2011 کے بعد یہ پہلا موقع ہوگا جب ہندستان اپنے روایتی حریف پاکستان سے بین الاقوامی کرکٹ کونسل (آئی سی سی) کے کسی ٹورنامنٹ کے گروپ مرحلے میں نہیں کھیلے گا۔ آسٹریلیا میں اگلے سال ہونے والا ٹوئنٹی -20 ورلڈ کپ 18 اکتوبر سے شروع ہو کر 15 نوبر تک چلے گا۔دونوں ٹیموں نے 2011 سے پانچ آئی سی سی ٹورنامنٹوں کے گروپ مرحلے میں ایک دوسرے کا سامنا کیا ہے اور اسی سال انگلینڈ میں ہونے والے ون ڈے ورلڈ کپ میں بھی دونوں کا سامنا ہونا ہے ۔ لیکن کرکٹ کی سخت حریف ان دونوں ٹیموں کا آسٹریلیا میں 2020 میں ہونے والے ٹوئنٹی -20 ورلڈ کپ کے گروپ میچ میں مقابلہ نہیں ہو پائے گا۔ دراصل موجودہ ٹوئنٹی -20 رینکنگ میں پاکستان نمبر ایک مقام پر ہے اور ہندستان کا مقام اس کے بعد نمبر دو ہے ۔ قوانین کے مطابق نمبر ایک اور دو کی ٹیمیں ایک گروپ میں نہیں رہ سکتیں، اسی وجہ سے ان دونوں ٹیموں کو مختلف گروپ میں مقام دیا گیا ہے ۔کرکٹ کے دو دیگر روایتی حریف ملک آسٹریلیا اور انگلینڈ بھی گروپ مرحلے میں نہیں کھیلیں گے ۔ آسٹریلیا گروپ اے میں اور انگلینڈ گروپ بی میں ہے ۔ عالمی رینکنگ میں آٹھ سرفہرست ٹیموں پاکستان، ہندستان ، انگلینڈ، آسٹریلیا، جنوبی افریقہ، نیوزی لینڈ، ویسٹ انڈیز اور افغانستان کو براہ راست اہم ٹورنامنٹ میں داخلہ دیا گیا ہے ۔ درجہ بندی میں نویں اور دسویں نمبر کی ٹیمیں سری لنکا اور بنگلہ دیش چھ دیگر ٹیموں کے ساتھ گلوگ اور ہوبارٹ میں کوالیفائنگ ٹورنامنٹ کھیلیں گی جس سے سپر 12 کے لئے باقی چار ٹیموں کا فیصلہ ہوگا۔ یہ چار ٹیمیں اہم ٹورنامنٹ میں آٹھ دیگر ٹیموں کے ساتھ جڑیں گی۔ پاکستان سپر 12 میں اپنی مہم کی شروعات میزبان آسٹریلیا کے خلاف 24 اکتوبر کو سڈنی میں کرے گا جبکہ ہندستان دن کے دوسرے میچ میں نئے پرتھ اسٹیڈیم میں جنوبی افریقہ سے کھیلے گا۔