عظمیٰ نیوز سروس
راجوری//سرکاری اسکیموں کے موثر نفاذ کو یقینی بنانے اور ترقیاتی ضروریات کو پورا کرنے کے لئے ڈپٹی کمشنر راجوری ابھیشیک شرما نے جل جیون مشن (جے جے ایم) اسکیموں کی پیشرفت کا جائزہ لینے کے لئے دسل کا دورہ کیا۔یہ دورہ انتظامیہ کی جانب سے ہر گھر کو پینے کے صاف پانی کی فراہمی کے لئے پانی کی فراہمی کے اہم منصوبوں کی نگرانی اور عمل درآمد میں تیزی لانے کی جاری کوششوں کا حصہ تھا۔ڈپٹی کمشنر نے علاقے میں متعدد مقامات کا معائنہ کیا اور مقامی لوگوںکے ساتھ ان کے مسائل کو سمجھنے کیلئے ان سے تفصیلی بات چیت کی۔ مقامی لوگوں نے بعض کاموں کی تکمیل میں تاخیر پر تشویش کا اظہار کیا اور جے جے ایم سے اپنی توقعات کو اجاگر کیا۔ان کے خدشات کا جواب دیتے ہوئے، ڈی سی نے عوام کو یقین دلایا کہ انتظامیہ جے جے ایم کے فوائد کی بروقت فراہمی کے لئے پرعزم ہے۔انہوں نے متعلقہ محکموں کو تمام رکاوٹوں کو دور کرنے اور جاری کاموں کو تیز کرنے کی ہدایت کی۔ڈی سی نے حکام کو یہ بھی ہدایت کی کہ وہ باقاعدگی سے جائزہ لیں، عمل کو ہموار کریںاور تاخیر سے بچنے کے لئے عملدرآمد کرنے والی ایجنسیوں کے درمیان ہم آہنگی کو یقینی بنائیں۔جے جے ایم کے معائنے کے بعد ڈپٹی کمشنر نے ٹھنڈی کسی میں ماکوٹے پارک کا دورہ کیا تاکہ اس کی حالت کا جائزہ لیا جا سکے اور اس کی دیکھ بھال کے سلسلے میں مکینوں کی طرف سے اٹھائے گئے مسائل کو حل کیا جا سکے۔ دورے کے دوران، انہوں نے صفائی کے مسائل اور غیر فعال لائٹس سمیت کئی کوتاہیوں کا مشاہدہ کیا، جو عوام کے لئے تفریحی جگہ کے طور پر پارک کی افادیت سے سمجھوتہ کرتے ہیں۔ان خدشات کو دور کرنے کے لئے ڈی سی راجوری نے متعلقہ محکموں کو ہدایت دی کہ وہ فوری طور پر پارک میں صفائی مہم شروع کریں اور تمام غیر فعال لائٹس کو تبدیل کریں۔ انہوں نے اس بات کو یقینی بنانے کی اہمیت پر زور دیا کہ عوامی مقامات صاف، محفوظ اور خوش آئند رہیں۔ انہوں نے مزید کہا کہ ’پارکس اور تفریحی مقامات کمیونٹی کی فلاح و بہبود میں اہم کردار ادا کرتے ہیں، اور ان کی مناسب دیکھ بھال ایک ترجیح ہے‘۔ڈپٹی کمشنر کا دورہ ضلعی انتظامیہ کے شفاف طرز حکمرانی، فعال عوامی شمولیت اور ترقیاتی منصوبوں کے بروقت نفاذ کے عزم کی نشاندہی کرتا ہے۔ انہوں نے عہدیداروں پر زور دیا کہ وہ عوامی شکایات کا جواب دیں اور انہیں جلد از جلد حل کرنے کی سمت کام کریں۔
