عظمیٰ نیوزسروس
جموں//جموں و کشمیر کے ضلع ریاسی میں ویشنو دیوی یاترا جمعہ کو مسلسل 11ویں دن بھی معطل رہی۔26اگست کو لینڈ سلائیڈنگ کے نتیجے میں 34افراد ہلاک اور 20دیگر زخمی ہونے کے بعد یاترا کو معطل کر دیا گیا تھا۔ اگرچہ دس دنوں کی شدید بارشوں، سیلاب اور لینڈ سلائیڈنگ کے بعد سورج چمکنے کے ساتھ موسم میں نمایاں بہتری آئی ہے، حکام نے یاترا کو دوبارہ شروع کرنے کے بارے میں ابھی تک کوئی فیصلہ نہیں لیاہے۔ایک عہدیدارنے بتایا کہ یاترا ابھی تک معطل ہے۔ یہ گزشتہ ہفتے حکام کی طرف سے یاتریوں کی حفاظت کو مدنظر رکھتے ہوئے لیا گیا فیصلہ ہے۔عہدیدار نے مزید کہا کہ یاترا کو دوبارہ شروع کرنے کا فیصلہ تمام پہلوؤں کا جائزہ لینے کے بعد مناسب وقت پر لیا جائے گا۔یہ معطلی کووڈپابندیوں کے بعد سب سے طویل ہے، جس میں حکام یاتریوں کی حفاظت کو ترجیح دیتے ہیں اور کٹرہ میں تباہ شدہ یاتری ٹریک اور تجارتی ڈھانچے کی بحالی کا کام کرتے ہیں۔دریں اثنا، لوکل ٹرین خدمات، جو ویشنو دیوی مندرکے بیس کیمپ جموں اور کٹرہ کے درمیان مقامی لوگوں اور پھنسے ہوئے مسافروں کی نقل و حرکت کی سہولت کے لیے شروع کی گئی تھیں، معطل رہیں۔
