عظمیٰ ویب ڈیسک
جموں/شری ماتا ویشنو دیوی یاترا پیر کو لگاتار اکیسویں روز بھی معطل رہی، جس سے عقیدت مندوں میں مایوسی اور تشویش کی لہر دوڑ گئی ہے۔ ریاسی ضلع کے کٹرا بیس کیمپ سے شروع ہونے والی یاترا کو 14 ستمبر سے بحال کیا جانا تھا، تاہم شرائن بورڈ کے مطابق اگلے احکامات تک یاترا معطل ہی رہے گی۔شرائن بورڈ کے ایک عہدیدار نے کہا، ’یاترا کو فی الحال ملتوی کر دیا گیا ہے، عقیدت مند بورڈ کے آفیشل ذرائع سے تازہ صورت حال معلوم کریں ۔‘
واضح رہے کہ 26 اگست کو ویشنو دیوی راستے پر موسلا دھار بارشوں کے نتیجے میں مٹی کے تودے گرنے سے کم از کم 34 یاتری ہلاک اور کئی دیگر زخمی ہوگئے تھے۔ اسی سانحے کے بعد سے یاترا بند ہے۔لیفٹیننٹ گورنر منوج سنہا، جو شری ماتا ویشنو دیوی شرائن بورڈ کے چیئرمین بھی ہیں، نے اس سانحے کی وجوہات جاننے کے لیے ایک اعلیٰ سطحی تین رکنی کمیٹی تشکیل دی ہے۔
اس کمیٹی کی سربراہی محکمہ جل شکتی کے ایڈیشنل چیف سکریٹری شالین کابرا کر رہے ہیں جبکہ ممبران میں صوبائی کمشنر جموں رمیش کمار اور انسپکٹر جنرل آف پولیس بی ایس توتی شامل ہیں۔ کمیٹی اپنی جامع رپورٹ جلد ایل جی کو پیش کرے گی۔یاترا کی معطلی سے عقیدت مندوں میں مایوسی چھا گئی ہے۔ کٹرا بیس کیمپ پر موجود کئی یاتریوں نے انتظامیہ سے اپیل کی ہے کہ جلد از جلد صورتحال کو معمول پر لاکر یاترا بحال کی جائے، تاکہ وہ اپنے مذہبی فریضے کی ادائیگی کر سکیں۔
ویشنو دیوی یاترا لگاتار 21ویں روز بھی معطل، عقیدت مندوں میں مایوسی
