عاصف بٹ
کشتواڑ// جمعرات کی صبح کشتواڑ ضلع کے پہاڑی علاقے میں دو ولیج ڈیفنس گارڈز (وی ڈی جیز) کو ملی ٹینٹوں نے اغوا کرنے کے بعد قتل کر دیا، جس پر جموں و کشمیر کے لیفٹیننٹ گورنر منوج سنہا، نیشنل کانفرنس کے رہنما عمر عبداللہ اور فاروق عبداللہ، اور پی ڈی پی صدر محبوبہ مفتی سمیت بی جے پی اور دیگر پارٹی رہنماؤں نے اس افسوسناک واقعے کی شدید مذمت کی ہے۔سناتن دھرم سبھا نے کشتواڑ میں آج مکمل بند کی کال دی ہے اور مختلف مقامات پر احتجاجی مظاہرے کیے جا رہے ہیں۔ واقعے کے بعد علاقے میں سیکورٹی فورسز کی جانب سے بڑے پیمانے پر مشترکہ تلاشی مہم شروع کی گئی ہے۔پولیس کے ترجمان نے بتایا کہ دونوں وی ڈی جی ارکان، نذیر احمد اور کلدیپ کمار، جو کہ اوہلی کنتواڑہ کے رہائشی تھے، مویشی چرانے کے دوران بالائی علاقوں میں لاپتہ ہو گئے تھے۔بعد ازاں، ان کی لاشوں کی تصاویر سوشل میڈیا پر وائرل ہوئیں، جس سے ان کے اہل خانہ نے ان کی شناخت کی تصدیق کی۔کلدیپ کے بھائی پرتھوی نے بتایا کہ انہیں اطلاع ملی ہے کہ ان کے بھائی اور احمد کو ملی ٹینٹوں نے اغوا کر کے قتل کیا ہے۔ انہوں نے مزید کہا کہ بڑے پیمانے پر تلاشی مہم جاری ہے مگر تاحال لاشیں برآمد نہیں ہو سکی ہیں۔پرتھوی نے کہا کہ ان کے والد امر چند کا ایک ہفتہ قبل انتقال ہوا تھا اور اب بھائی کی موت کی خبر نے ان کے خاندان کو ایک اور صدمے سے دوچار کر دیا ہے۔ مقامی ذرائع کے مطابق، ملی ٹینٹوں نے مقتولین کے فون کا استعمال کرتے ہوئے ان کی ہلاکت کی تصاویر شیئر کیں۔جیش محمد کی ذیلی تنظیم کشمیر ٹائیگرز نے ان ہلاکتوں کی ذمہ داری قبول کی ہے اور متاثرین کی آنکھوں پر پٹی باندھ کر لی گئی تصاویر بھی سوشل میڈیا پر شیئر کی ہیں۔لیفٹیننٹ گورنر منوج سنہا نے وی ڈی جی ارکان پر ہونے والے اس بزدلانہ حملے کی مذمت کرتے ہوئے کہا کہ جموں و کشمیر حکومت دہشت گرد تنظیموں کا قلع قمع کرنے کے لیے پرعزم ہے اور اس وحشیانہ فعل کا بدلہ لینے کا عہد کرتی ہے۔ ایک پوسٹ میں انہوں نے کہا، “وی ڈی جی ارکان پر بزدلانہ دہشت گرد حملے کی مذمت کے لیے الفاظ کافی نہیں ہیں۔ شہداء کے اہل خانہ سے دلی تعزیت پیش کرتا ہوں”۔نیشنل کانفرنس کے صدر فاروق عبداللہ اور سابق وزیر اعلیٰ عمر عبداللہ نے بھی اس واقعے کی مذمت کرتے ہوئے کہا کہ اس قسم کی تشدد کی کارروائیاں جموں و کشمیر میں دیرپا امن کی راہ میں رکاوٹ ہیں۔پی ڈی پی صدر محبوبہ مفتی، بی جے پی رہنما اور سابق نائب وزیر اعلیٰ کویندر گپتا اور کانگریس رہنما رویندر شرما نے بھی ان ہلاکتوں پر افسوس کا اظہار کیا ہے۔واضح رہے کہ اس سال کشتواڑ، راجوری، پونچھ، ریاسی، ادھم پور، ڈوڈہ اور کٹھوعہ سمیت جموں کے مختلف اضلاع میں ملی ٹینسی کے حملے میں اضافہ دیکھا گیا ہے، جسے سیکورٹی ایجنسیوں نے سرحد پار دہشت گردوں کی جانب سے علاقے میں عسکریت پسندی کو بحال کرنے کی کوشش قرار دیا ہے۔
