یو این آئی
نئی دہلی//اپوزیشن نے بدھ کو لوک سبھا میں پیش کئے گئے وقف(ترمیمی)بل 2025کو حکومت کی طرف سے لایا جانے والا آئین مخالف پالیسی کا نتیجہ قرار دیا۔ بھارتیہ جنتا پارٹی ملک میں انتشار پھیلا رہی ہے اور سماج کو تقسیم کرنے کا کام کر رہی ہے۔کانگریس کے گورو گوگوئی نے اقلیتی امور کے وزیر کرن رجیجو کی طرف سے ایوان میں بل پر بحث کرانے اور اسے منظور کرانے کے لیے پیش کردہ تحریک پر بحث کا آغاز کرتے ہوئے آج کہا کہ اپوزیشن بھی چاہتی ہے کہ قانون میں ضروری ترامیم کی جائیں لیکن حکومت کی نیت ٹھیک نہیں ہے اور وہ تقسیم کی سیاست میں ملوث ہے۔ انہوں نے کہا کہ حکومت وقف بل کے حوالے سے کنفیوژن پھیلانے کی کوشش کر رہی ہے۔ ملک کا آئین ہر فرد کے لیے برابری کو یقینی بنانے، بنیادی حقوق کے تحفظ، وفاقی ڈھانچے کے تحفظ اور ملک کی سالمیت کی بات کرتا ہے لیکن حکومت کا یہ وقف بل آئین پر حملہ ہے اور اس کا مقصد انتشار پھیلا کر اور معاشرے کو تقسیم کرکے ووٹ بینک کو تحفظ فراہم کرنا ہے۔ انہوں نے کہا کہ حکومت یہ کہہ کر کنفیوژن پھیلا رہی ہے کہ بل پر بڑے پیمانے پر بحث ہو چکی ہے جبکہ حکومت اس پر من مانی کرتی رہی اور ایوان میں وسیع بحث کی بات کر کے انتشار پھیلا رہی ہے۔ انہوں نے یہ بھی کہا کہ حکومت اس بل کے حوالے سے ہونے والی میٹنگز کے منٹس ایوان میں رکھے تو سچ سب کے سامنے آجائے گا۔ انہوں نے یہ سوال بھی اٹھایا کہ یہ بل اقلیتی امور کی وزارت نے نہیں بلکہ کسی اور وزارت نے تیار کیا ہے، اس لیے اس میں اقلیتوں کے مفادات کے لیے دفعات نہیں رکھی گئی ہیں ۔ گوگوئی نے کہا کہ کوئی بھی شخص وقف کر سکتا ہے لیکن حکومت اس قانون کے ذریعے کسی شخص کا حق چھیننے کا کام کر رہی ہے۔ یہ بل ملک کی سالمیت، سماج کے اتحاد، شہریوں کے بنیادی حقوق اور آئین کی روح کے خلاف ہے اور اس کے ذریعے حکومت مکمل طور پر انتشار پھیلا رہی ہے۔ انہوں نے کہا کہ بل میں پہلے سے ہی یہ شرط موجود تھی کہ اس میں دو یا دو سے زیادہ خواتین اراکین ہو سکتی ہیں لیکن بی جے پی حکومت نے اسے صرف دو خواتین تک محدود کر دیا ہے۔ حکومت یہ غلط فہمی پھیلا رہی ہے کہ وقف کی دفعات غلط ہیں لیکن حکومت اس میں جو دفعات بنا رہی ہے۔
ناکامیاں چھپانے کی حکومت کی کوشش:اکھلیش | اقلیتوں کے حقوق پر حملہ:عمران پرتاپ گڑھی
یو این آئی
نئی دہلی//سماج وادی پارٹی کے اکھلیش یادو نے لوک سبھا میں کہا کہ مودی حکومت وقف بل کے ذریعے اپنی ناکامیوں کو چھپانے کے لیے یہ بل لائی ہے اور بھارتیہ جنتا پارٹی اس کے ذریعے پولرائزیشن کی سیاست کرکے اپنے کم ہوتے ہوئے ووٹوں کو سنبھالنا چاہتی ہے۔ وقف (ترمیمی)بل 2025پر ایوان میں بحث کے دوران یادو نے کہا کہ نوٹ بندی، کسانوں کی آمدنی کو دوگنا کرنے، گنگا کی صفائی، اسمارٹ سٹی، آدرش گرام یوجنا وغیرہ میں حکومت کی ناکامیوں سے عوام کی توجہ ہٹانے کے لیے یہ بل لایا گیا ہے۔ انہوں نے کہا کہ جو حکومت پریاگ راج مہاکمبھ میں بھگدڑ میں ہلاک شدگان کی تعداد نہیں بتا پارہی ہے، وہ وقف املاک کی گنتی کی تیاری میں لگی ہے۔انہوں نے کہا کہ اس بل کے پیچھے کا مقصد کروڑوں مسلمانوں کے گھر اور دکانیں چھیننا ہے اور یہ بل بی جے پی کی فرقہ وارانہ سیاست کی ایک نئی شکل ہے۔ادھر کانگریس کے راجیہ سبھا ممبرعمران پرتاپ گڑھی بدھ کو جب پارلیمنٹ پہنچے تو وہ سیاہ کپڑوں میں نظر آئے۔ انہوں نے اس دوران کہا کہ یہ وقف بل اقلیتوں کے حقوق پرحملہ ہے، اسے ہم ہرگزقبول نہیں کریں گے۔ پرتاپ گڑھی نے اپنے ہاتھوں میں’وقف بل نامنظور ‘کی تختی اٹھا رکھی تھی۔ عمران پرتاپ گڑھی کا یہ انوکھا انداز سوشل میڈیا پر خوب وائرل ہو رہا ہے۔واضح رہے کہ عمران پرتاپ گڑھی نے گزشتہ ماہ ہی پارلیمنٹ میں ممبئی حج کمیٹی کے ذریعہ چلائے جارہے سول سروسزکوچنگ سینٹربند کئے جانے پر تلخ تبصرہ کیا تھا۔ انہوں نے وقف ترمیمی بل 2024کی انوکھے اور منفرد انداز میں مخالفت کی ہے۔
راہل کی پارٹی کے لوک سبھا ممبران کے ساتھ میٹنگ
یو این آئی
نئی دہلی//کانگریس کے سابق صدر اور لوک سبھا میں قائد حزب اختلاف راہل گاندھی نے وقف بل کے سلسلے میں بدھ کولوک سبھا میں پارٹی کے ارکان پارلیمنٹ کے ساتھ یہاں پارلیمنٹ ہائوس کے احاطے میں میٹنگ کی اور انہیں مشورہ دیا کہ وہ اس بل پر پارلیمنٹ میں اپنا موقف مضبوطی سے پیش کریں۔کانگریس ارکان پارلیمنٹ کی میٹنگ کی صدارت راہل گاندھی نے کی جو صبح تقریباً 9.30بجے شروع ہوئی اور ایک گھنٹے سے زیادہ تک جاری رہی۔ بعد ازاں تمام ممبران پارلیمنٹ لوک سبھا کی کارروائی میں حصہ لینے کے لیے ایوان کی طرف چلے گئے۔یہ معلومات دیتے ہوئے گاندھی نے کہا’’آج ایوان کی کارروائی شروع ہونے سے پہلے، میں نے پارلیمنٹ ہاس انیکسی میں کانگریس پارلیمانی پارٹی کے تمام لوک سبھا ممبران پارلیمنٹ کے ساتھ میٹنگ کی۔ اس دوران وقف بل پر کانگریس پارٹی کے موقف کو مضبوطی سے پیش کرنے پر بات چیت ہوئی‘‘۔
