وسیم اکرم نے انگلینڈ سے جوابی ٹور کا مطالبہ کردیا

 لاہور/ وسیم اکرم نے بھی انگلینڈ سے جوابی ٹور کا مطالبہ کردیا، پاکستان کے سابق کپتان کا کہنا ہے کہ موجودہ صورتحال میں دورے کے بعد ای سی بی پاکستان کرکٹ کا قرضدار ہے،پی ایس ایل میں شرکت کرنے والے انگلش کرکٹرز خوشگوار یادیں لے کر وطن واپس گئے،اگر ٹیم آتی ہے تو مہمان کھلاڑیوں کی میدان کے اندر اور باہر بھرپور دیکھ بھال ہوگی۔تفصیلات کے مطابق انگلینڈ کی ٹیم نے 2005-6 کے بعد سے پاکستان کا دورہ نہیں کیا،کورونا وائرس کی وجہ سے پیدا ہونے والی صورتحال میں پی سی بی نے اپنے اسکواڈ کو سیریز کیلئے بھجوانے کا مشکل فیصلہ کیا، یوں انگلش بورڈ کو 280ملین پاؤنڈز کے بھاری نقصان سے بچ گیا۔اگرچہ پی سی بی حکام نے بار بار کہا کہ کوئی ڈیل نہیں ہوئی لیکن ای سی بی پر جوابی دورہ کیلئے اخلاقی دباؤ بڑھنے لگا ہے،سابق کپتان وسیم اکرم نے کہاکہ موجودہ صورتحال میں دورے کے بعد انگلش بورڈ پاکستان کرکٹ کا قرضدار ہے،انگلینڈ کے کرکٹرز پی ایس ایل میں شرکت کیلئے آئے تھے،ایلکس ہیلز اور کرس جورڈن کراچی کنگز کی ٹیم میں شامل رہے۔