عظمیٰ نیوز سروس
پونچھ//وزیر اعلیٰ جموں و کشمیر عمر عبداللہ نے کابینہ وزیر جاوید رانا، وزیر اعلیٰ کے سیاسی مشیر ناصر اسلم وانی اور دیگر اعلیٰ حکام کے ہمراہ ضلع پونچھ کے معروف دینی ادارے جامعہ ضیاء العلوم کا دورہ کیا۔ اس موقع پر انہوں نے حالیہ سرحد پار گولہ باری میں جاں بحق ہونے والے جامعہ سے وابستہ تین افراد کے اہل خانہ سے تعزیت کا اظہار کیا۔وزیر اعلیٰ نے جامعہ کے مہتمم مولانا غلام قادر ضیائی اور چیئرمین جامعہ گروپ مولانا سعید حبیب سے ملاقات کی اور ادارے کو درپیش سانحہ پر دلی ہمدردی کا اظہار کرتے ہوئے کہا کہ یہ ایک ایسا نقصان ہے جس کا ازالہ ممکن نہیں، کیونکہ ان افراد نے نہ صرف تعلیمی میدان میں بلکہ معاشرتی ہم آہنگی میں بھی اہم کردار ادا کیا۔اس افسوسناک واقعے میں جامعہ نے قاری محمد اقبال، محمد اکرم (جو معروف استاد مولانا بشیر احمد ضیائی کے بھائی تھے)، اور اسکول ونگ کی معلمہ رشمی سودن کے کمسن بیٹے کو کھو دیا۔ وزیر اعلیٰ نے ان کے اہل خانہ سے بھی ملاقات کی اور انہیں حکومت کی جانب سے ہر ممکن تعاون کی یقین دہانی کرائی۔عمر عبداللہ نے شہری علاقوں کو نشانہ بنانے والی سرحد پار گولہ باری کی سخت مذمت کرتے ہوئے کہا کہ اسکولوں، دینی اداروں اور رہائشی علاقوں پر حملے ناقابل برداشت ہیں۔ انہوں نے کہا کہ پونچھ کے عوام نے ہمیشہ حالات کا مقابلہ جواں مردی سے کیا ہے اور حکومت ان کے ساتھ کھڑی ہے۔وزیر جنگلات و جل شکتی جاوید رانا نے بھی جامعہ کو پہنچنے والے نقصان پر افسوس کا اظہار کیا اور کہا کہ ریاستی حکومت متاثرہ خاندانوں کی بحالی کے لیے سنجیدہ اقدامات کرے گی۔دورے کے اختتام پر مرحومین کے لئے خصوصی دعا کی گئی اور جامعہ کی تعلیمی و دینی خدمات کو خراج تحسین پیش کیا گیا۔
