وزیر اعلیٰ نے رن فار ہیلتھ میں شرکت کی ،صحت مند زندگی کیلئے جسمانی صحت اور ذہنی چستی یکساں طور لازمی ہے : محبوبہ

سرینگر//وزیر اعلیٰ محبوبہ مفتی نے کہا کہ ایک صحت مند زندگی گذارنے کیلئے جسمانی صحت کے ساتھ ساتھ ذہنی چستی بھی لازمی ہے ۔ انہوں نے کہا کہ حکومت ریاست میں کھیل کود سرگرمیوں کو فروغ دینے پر توجہ مرکوز کر رہی ہے ۔ وزیر اعلیٰ نے اس کا اظہار صبح کی سیر مہم ۔ رن فار ہیلتھ میں  آج صبح شرکت کرنے کے دوران کیا ۔ صبح کی سیر کی مہم جموں کشمیر سٹیٹ سپورٹس کونسل کی جانب سے شروع کی گئی ہے جس میں مختلف سکولوں کے طلاب ، نوجوان لڑکے اور لڑکیوں کے علاوہ زندگی کے ہر شعبہ سے تعلق رکھنے والے افراد نے شرکت کی ۔ وزیر اعلیٰ نے کہا کہ کھیل کود سرگرمیاں تدریسی عمل کی طرح ہی طلاب کیلئے کافی اہم ہیں ۔ انہوں نے امید ظاہر کی کہ مہم میں ہر ہفتہ مختلف سکولوں کے طالب علم شرکت کر کے اس مہم کو آگے بڑھائیں گے ۔ محبوبہ مفتی جو کہ سٹیٹ سپورٹس کونسل کی چئیر پرسن ہیں ، نے کہا کہ اُن کی حکومت نے کھیل کود شعبے کی ترقی کو ترجیحی شعبہ قرار دے کر اس کیلئے سالانہ بجٹ میں مختص رقومات میں کافی اضافہ کیا ہے ۔ انہوں نے کہا کہ اب تک ریاست کے نوجوان کھلاڑیوں کیلئے 200 کوچوں کی خدمات حاصل کی گئی ہیں جو انہیں مختلف کھیلوں میں تربیت دے رہے ہیں ۔ اس کے علاوہ کھیل میدان انڈور سٹیڈیم کھیل کود کے ساز و سامان وغیرہ جیسے لازمی بنیادی ڈھانچہ بھی ریاست بھر کے نوجوانوں کیلئے دستیاب رکھا جا رہا ہے ۔ رکنِ اسمبلی وچی اعجاز احمد میر ، سیکرٹری جے کے سپورٹس کونسل وحید الرحمان پرہ ، ڈپٹی کمشنر سرینگر اور دیگر متعلقہ افسران اس موقعہ پر موجود تھے ۔