سرینگر/وزیر اعلیٰ محبوبہ مفتی نے آج ہدایت دی کہ زیادہ سے زیادہ نوجوانوں کے تہواروں کا اہتمام کیا جائے تا کہ اُن میں وحدت کا جذبہ پیدا ہو ۔ انہوں نے کھیل کود کی سرگرمیوں کو بڑھاوا دینے کیلئے بنیادی ڈھانچے میں بہتری لانے پر بھی زور دیا تا کہ نوجوان کھیل کودسرگرمیوں میں زیادہ سے زیادہ حصہ لیں ۔ جموں و کشمیر سٹیٹ سپورٹس کونسل کی 56 ویں میٹنگ کی صدارت کرتے ہوئے وزیر اعلیٰ نے نوجوانوں میں سپورٹس ٹیلنٹ کو بڑھاوا دینے کیلئے پیشہ وارانہ طریقہ اختیار کرنے پر زور دیتے ہوئے کونسل کو یقین دلایا کہ حکومت کونسل کو بھر پور تعاون فراہم کرے گی ۔ انٹر ولیج ، انٹر ڈسٹرکٹ اورانٹر پراونس ٹورنیز کا اہتمام کرنے پر زور دیتے ہوئے وزیر اعلیٰ نے امید ظاہر کی کہ ایسی سرگرمیوں کی بدولت نوجوان ایک دوسرے کو سمجھنے میں بہت کامیاب ہوں گے ۔ انہوں نے ضلع سطح پر ٹیموں کی تشکیل دینے پر زور دیتے ہوئے کہا کہ ایسا کرنے سے نوجوانوں میں کھیل کود مقابلوں میں حصہ لینے کا شوق پیدا ہو گا ۔ یوتھ سروسز و سپورٹس کے وزیر مولوی عمران رضا انصاری بھی اس موقعہ پر موجود تھے ۔ محبوبہ مفتی نے سپورٹس کونسل کے عہدیداروں سے کہا کہ وہ اُن تمام کھیلوں کی فہرست تیار کریں ، جن میں ریاست کے نوجوان دیگر ریاستوں کے ساتھ مقابلوں میں حصہ لے سکیں ۔ انہوں نے واٹر سپورٹس اور ایڈوینچر سپورٹس کا ذکر کرتے ہوئے کہا کہ ایسی کھیلوں میں دونوں لڑکے ، لڑکیاں حصہ لے سکتی ہیں ۔ وزیر اعلیٰ جو کونسل کی چئیر پرسن بھی ہیں نے کھیل کود سرگرمیوں کو کام کے اوقات کے بعد اہتمام کرنے کی ہدایت دی ۔ انہوں نے خاص سٹیڈیموں کیلئے روشنی کا انتظام کرنے کیلئے 10 کروڑ روپے کی رقم منظور کی ۔ اس سے قبل سیکرٹری جے اینڈ کے سٹیٹ سپورٹس کونسل وحید الرحمان پرا نے میٹنگ کو ریاست میں سپورٹس سرگرمیوں کے سلسلے میں اٹھائے جا رہے اقدامات کی تفاصیل پیش کیں ۔ چیف سیکرٹری بی بی ویاس ، پرنسپل سیکرٹری فائنانس نوین چودھری ، وزیر اعلیٰ کے پرنسپل سیکرٹری روہت کنسل ، سیکرٹری یوتھ سروسز اینڈ سپورٹس ہلال پرے اور متعلقہ اعلیٰ حکام بھی میٹنگ میں موجود تھے ۔
وزیر اعلیٰ نے جے اینڈ کے سپورٹس کونسل کی 56 ویں میٹنگ کی صدارت کی
