عظمیٰ نیوز سروس
سرینگر//وزیر اعظم نریندر مودی مسلسل تیسری بار اقتدار سنبھالنے کے بعد 21 جون کو کشمیر کا اپنا پہلا دورہ کرنے والے ہیں۔توقع ہے کہ وزیر اعظم یوگا کے عالمی دن کے موقع پر سرینگر میں منعقد ہونے والے یوگا پروگرام میں شرکت کریں گے۔میڈیا رپورٹس کے مطابق، پی ایم مودی کا سرینگر میں بین الاقوامی یوگا ڈے منانے کا امکان ہے۔ مودی اس تقریب میں حصہ لیں گے جو سرینگر میں ڈل جھیل اور زبرون پہاڑیوں کے دامن میں ایس کے آئی سی سی میں منعقد ہوگا۔لیفٹیننٹ گورنر منوج سنہا کی قیادت میں انتظامیہ کو اس سلسلے میں الرٹ کر دیا گیا ہے، جب کہ جموں و کشمیر سپورٹس کونسل کو ہدایت کی گئی ہے کہ وہ وزیر اعظم کے یوم یوگا میں شرکت کے لیے تیاریاں کریں۔جموں و کشمیر سپورٹس کونسل کے عہدیداروں نے تیاریاں شروع کر دی ہیں اور یوگا ٹیموں اور انسٹرکٹرز کو اس میگا ایونٹ کی تیاری کے لیے کہا گیا ہے۔رپورٹس میں کہا گیا ہے کہ جے اینڈ کے سپورٹس کونسل نے اپنے متعلقہ سپورٹس ونگز سے کہا ہے کہ وہ میگا ایونٹ کے لیے 3000 کھلاڑیوں کو جمع کریں، اس کے علاوہ سیکورٹی ٹیمیں ایس کے آئی سی سی کا دورہ کر رہی ہیں تاکہ پنڈال میں سیکورٹی کے وسیع انتظامات کیے جا سکیں۔
