یو این آئی
جموں //وزیر اعظم نریندر مودی کے دورے جموں کے پیش نظر صوبے بھر میں سیکورٹی کے غیر معمولی انتظامات کئے گئے ہیں۔ جمعہ کے روز لیفٹیننٹ گورنر منوج سنہا نے مولانا آزاد سٹیڈیم جموں کا دورہ کیا اوروہاں پر سیکورٹی انتظامات کا جائزہ لیا۔ وزیر اعظم مودی 20 فروری کو مولانا آزاد اسٹیڈیم جموں میں عوامی جلسے سے خطاب کریں گے۔ وزیر اعظم 20فروری کو جموں وارد ہونگے جس کو دیکھتے ہوئے جموں میں سیکورٹی کے فقید المثال انتظامات کئے گئے ہیں۔ جمعہ کے روز سیکورٹی فورسز نے جموں کے مولانا آزاداسٹیڈیم کو پوری طرح سے سیل کیا جبکہ آس پاس علاقوں کی بھی تلاشی لی گئی۔ صوبے میں ناکوں کا جال بچھایا گیا ہے اور کسی کو بھی بغیر تلاشی کے آگے جانے کی اجازت نہیں دی جارہی ہے۔ لیفٹیننٹ گورنر منوج سنہا نے مولانا آزاد اسٹیڈیم میں سیکورٹی انتظامات کا جائزہ لیا۔ منوج سنہا کے ہمراہ پولیس اور انتظامیہ کے سینئر آفیسران موجود تھے۔ منوج سنہا کو پولیس اور انتظامیہ کے سینئر آفیسران نے بتایا کہ مولانا آزا داسٹیڈیم میں وزیر اعظم کے عوامی جلسے کے پیش نظر سیکورٹی کے سخت ترین انتظامات کئے گئے ہیں جبکہ آس پاس علاقوں کی اونچی عمارتوں پر شارپ شوٹرس بھی تعینات کئے گئے ہیں۔ ایک سینئر پولیس افسر نے بتایا کہ وزیر اعظم کے دورے کے پیش نظر جموں و کشمیر میں سکیورٹی کے سخت انتظامات کئے گئے ہیں۔انہوں نے بتایا: ‘شہر میں مختلف مقامات پر عارضی ناکے بٹھائے گئے ہیں۔ اس کے علاوہ سرحدی علاقوں میں نگرانی بڑھائی گئی ہے’۔ ناکوں پر مسافر بردار گاڑیوں کی بھی تلاشی کی جاتی ہے اور ان میں سوار مسافروں کی بھی جامہ تلاشی اور ان کے شناختی کارڈ بھی چیک کئے جا رہے ہیں۔انہوں نے بتایا کہ کئی مقامات پر راہگیروں کو بھی روک کر ان کی تلاشی اور شناختی کارڈ چیک کئے جاتے ہیں۔رپورٹس کے مطابق اپنے دورے کے دوران وزیر اعظم لیفٹیننٹ گورنر منوج سنہا فوج، پولیس اور پیرا ملٹری فورسز کے اعلیٰ افسروں کے ساتھ میٹنگیں کریں گے۔
