عظمیٰ نیوز سروس
سرینگر//مختلف اضلاع میں ترقیاتی اقدامات کا ذاتی طور پر جائزہ لینے کے لیے اپنی ضلعی جائزہ میٹنگوں کو جاری رکھتے ہوئے، وزیر اعلیٰ عمر عبداللہ نے کل بارہمولہ میں ایک اعلیٰ سطحی میٹنگ کی صدارت کی تاکہ ضلع میں کاموں کی انجام دہی اور مختلف سرکاری اسکیموں کے نفاذ میں پیش رفت کا جائزہ لیا جا سکے۔وزیراعلیٰ کو ڈسٹرکٹ کیپیکس کے تحت فنڈز کے استعمال کے سلسلے میں حاصل ہونے والی پیش رفت سے آگاہ کیا گیا۔وزیر اعلیٰ نے ورچوئل موڈ کے ذریعے 5.25 کروڑ روپے کی کل لاگت سے مکمل ہونے والے کئی ترقیاتی منصوبوں کا بھی افتتاح کیا۔ افتتاح کیے گئے کچھ بڑے پروجیکٹوں میں کلانترا میں 1×6.3 ایم وی اے ریسیونگ اسٹیشن کی تعمیر (1.84 کروڑ)، بہرام پورہ، رفیع آباد میں 33/11 KV 1×10 ایم وی اے ریسیونگ اسٹیشن (2.73 کروڑ) اور نیشنل ہائی وے کے ساتھ فٹ پاتھوں کی تعمیر پوسٹ آفس سے کرریاپارک تک کی تعمیر شامل ہیں۔ اہم ہدایات جاری کرتے ہوئے وزیر اعلیٰ نے انڈسٹریل اسٹیٹ کے لیے متبادل اراضی کی نشاندہی کرنے اور جی ایم سی بارہمولہ کی توسیع میں سہولت فراہم کرنے کی ہدایت دی۔ انہوں نے TRC سلام آباد کو محکمہ سیاحت کے حوالے کرنے، ڈرنگ ریزروائر کے لیے ڈی پی آر کی تشکیل، ٹنگمرگ میں ملٹی لیول کار پارکنگ اور ٹنگمرگ ایڈمنسٹریٹو کمپلیکس کی تکمیل کے لیے عمل شروع کرنے کی بھی ہدایت کی۔وزیر اعلیٰ نے مزید ہدایت دی کہ جنگلات اور آر اینڈ بی محکموں کی طرف سے بابا ریشی کے راستے گلمرگ تک متبادل سڑک تیار کرنے کے لیے مشترکہ مشقیں کی جائیں۔ انہوں نے بارہمولہ کے انتظامی کمپلیکس کے لیے ڈی پی آر کی تیاری، باغبانی اور ہاؤسنگ محکموں کی مربوط کوششوں کے ذریعے فروٹ منڈی کی بھیڑ کو کم کرنے اور توسیع کرنے اور مستقبل کے ترقیاتی منصوبوں کی حمایت کے لیے ضلعی سطح کے لینڈ بینک کی تشکیل پر بھی زور دیا۔
