عظمیٰ نیوز سروس
نئی دہلی// کابینہ کی میٹنگ میں 28مئی کوخریف فصلوں کیلئے ایم ایس پی میں اضافہ کی تجویز کو منظوری دے دی گئی۔ مرکزی وزیر اشونی ویشنو نے پریس بریفنگ کے دوران جانکاری دیتے ہوئے بتایا کہ کابینہ کی میٹنگ میں کچھ اہم فیصلوں کو منظوری دی گئی ہے۔ ان میں کسانوں کے متعلق 3اہم فیصلے لیے گئے۔ مرکزی وزیر نے مطلع کیا کہ وزیر اعظم مودی کی صدارت میں کابینہ کمیٹی برائے اقتصادی امور نے مارکیٹنگ سیشن 26-2025 کے لیے 14 خریف فصلوں کی کم از کم امدادی قیمت (ایم ایس پی)میں اضافے کو منظوری دے دی ہے۔اشونی ویشنو کے مطابق حکومت نے مارکیٹنگ سیشن 26-2025کیلئے خریف فصلوں کے ایم ایس پی میں اضافہ کیا ہے، تاکہ کسانوں کو ان کی پیداوار کے لیے منافع بخش قیمت کو یقینی بنایا جا سکے۔ مرکزی وزیر نے بتایا کہ مالی سال 26-2025کے لیے نظرثانی شدہ سود سبسڈی اسکیم (ایم آئی ایس ایس)کے تحت سود سبسڈی (آئی ایس)جزو کو جاری رکھنے کی منظوری دی اور ضروری فنڈنگ کے انتظام کو بھی منظوری دی۔کابینہ کی میٹنگ میں کئی ہائی وے کو منظوری دی گئی ہے۔ اشونی ویشنو کے مطابق آندھرا پردیش کے کرشنا پٹنم پورٹ تک جانے کے لیے 4 لین ہائی وے کی منظوری دی گئی ہے۔ اس کے ساتھ ہی باڈویل سے نیلور تک ایک نیا ہائی بنے گا۔ ترلام سے ناگدا ریلوے کو لائننگ کرنے کی منظوری دی گئی ہے۔ 41 کلومیٹر کے اس لائن کے لیے 1018 کروڑ کی منظوری دی گئی ہے۔ اس کے ساتھ ہی ممبئی سے دہلی کوریڈور کی گنجائش بڑھے گی۔ریل لائن کی صلاحیت میں اضافہ کے لیے اقتصادی امور کی کابینہ کمیٹی نے آج ہندوستانی ریلوے میں 2 ملٹی ٹریکنگ پروجیکٹوں کو منظوری دی۔ تاکہ مسافرین اور سامان دونوں کی بغیر کسی رکاوٹ تیز نقل و حمل کو یقینی بنایا جا سکے۔ رتلام-ناگدا تیسری اور چوتھی لائن اور وردھا-بلہارشاہ چوتھی لائن کو منظوری دی گئی۔
