یواین آئی
لوزان (سوئزرلینڈ)/جرمنی نے یورو ہاکی چیمپئن شپ 2025 کے فائنل میں پہنچتے ہی آئندہ ایف آئی ایچ ہاکی ورلڈ کپ بیلجیم اور نیدرلینڈز 2026 کے لیے کوالیفائی کر لیا ہے ۔فائنل میں جرمنی کا سامنا نیدرلینڈز سے ہوگا، لیکن میزبان ہونے کے ناطے نیدرلینڈز پہلے ہی آئندہ ورلڈ کپ میں اپنی جگہ پکی کر چکا ہے ، جس سے جرمنی کو یورپ سے ورلڈ کپ کے لیے براہِ راست کوالیفائی کرنے کا موقع مل گیا۔جرمنی نے اپنے یورو ہاکی سفر کا آغاز اپنے گھریلو میدان مونچینگلادبک میں، پول بی میں فرانس کے خلاف ایک سنسنی خیز میچ سے کیا۔ فرانس آخری دس منٹ تک دو گول کی برتری پر تھا، مگر جسٹس ویگینڈ کے دو اور گونزالو پیلات کے ایک گول کی بدولت میزبان ٹیم نے شاندار واپسی کرتے ہوئے تینوں پوائنٹس حاصل کر لیے ۔ اس کے بعد انگلینڈ کے خلاف ایک سخت میچ 1-1 سے ڈرا رہا، جس سے جرمنی پول بی میں اچھی پوزیشن میں آ گیا۔ پولینڈ کے خلاف آخری پول میچ میں شاندار کارکردگی دکھاتے ہوئے ، جسے انہوں نے 10-0 سے جیتا، ہوناماس نے فرانس کو پیچھے چھوڑتے ہوئے سیمی فائنل میں جگہ بنا لی۔دوسرے سیمی فائنل میں جرمنی کا مقابلہ اسپین سے ہوا۔ تقریباً ایک ماہ قبل اسپین نے برلن میں ایف آئی ایچ ہاکی پرو لیگ کے آخری دو میچوں میں ہوناماس کو جیت سے محروم کر کے ورلڈ کپ کوالیفکیشن میں سبقت حاصل کی تھی۔ مگر اس بار جرمنی نے ریڈ اسٹکس کے خلاف بازی پلٹ دی۔ ہوناماس پورے میچ میں برتری پر رہے اور پہلے کوارٹر میں دو گول داغے ۔
