وادی کشمیر میں اگلے چند دنوں تک موسم بہتر رہنے کا امکان :محکمہ موسمیات

عظمیٰ ویب ڈیسک
سرینگر/وادی کشمیر میں جاری خشک موسمی صورتحال کے بیچ محکمہ موسمیات نے 18اکتوبر تک خشک موسم کی پیشگوئی کرتے ہوئے 19اور 20اکتوبر کو ابر آلودموسم کے ساتھ ہلکی بارشوں کی پیشگوئی کی ہے ۔وادی کشمیر میں منگل کو بھی موسم خشک رہا جس دوران دن بھر دھوپ کھلنے کے نتیجے میں درجہ حرارت میں معمولی اضافہ دیکھنے کوملا ۔
ادھر محکمہ موسمیات نے اگلے چند دنوں تک موسم بہتر رہنے کی پیش گوئی کی ہے ۔ محکمہ موسمیات جموں و کشمیر نے 18اکتوبر تک بنیادی طور پر خشک موسم اور درجہ حرارت میں معمولی اضافہ ہونے کی پیش گوئی کی ہے۔محکمہ موسمیات نے بتایا کہ موسم بنیادی طور پر خشک رہے گا اور 18اکتوبر تک مطلع صاف رہے گا تاہم 19اور 20اکتوبر تک موسم عام طور پر ابر آلود رہنے کی توقع ہے۔
انہوں نے کہاکہ ان دنوں کے دوران جموں و کشمیر کے چند مقامات پر ہلکی بارش اور برفباری ہوسکتی ہے ۔ خاص طور پر بالائی علاقوں میں ہلکی برفباری کی توقع ہے ۔ انہوں نے کہا کہ 21سے 23اکتوبر تک موسم خشک رہے گا ۔انہوں نے کہا کہ مجموعی طور پر جموں و کشمیر اور لداخ میں اگلے 10 دنوں تک کسی بڑی بارش اور برفباری کی کوئی پیشگوئی نہیں ہے۔محکمہ موسمیات کے مطابق اگلے چند دنوں تک کاشتکاری کے عمل کودوبارہ شروع کیا جاسکتا ہے اور کاشتکاری اپنا کام انجام دے سکتے ہیں۔