یو این آئی
ڈنیڈن (نیوزی لینڈ)/ٹم سیفرٹ 45 اور فن ایلن 38 کی شاندار گیند بازی کی بدولت نیوزی لینڈ نے منگل کو دوسرے ٹی 20 میچ میں پاکستان کو 11 گیندیں باقی رہتے پانچ وکٹ سے شکست دے دی۔ اس کے ساتھ ہی نیوزی لینڈ نے پانچ میچوں کی سیریز میں 2-0 کی برتری حاصل کر لی ہے ۔ پاکستان کے 135 رن کے جواب میں بیٹنگ کرنے آئی نیوزی لینڈ کی اوپننگ جوڑی ٹم سیفرٹ اور فن ایلن نے عمدہ آغاز کیا اور پہلی وکٹ کے لیے 66 رن جوڑے ۔ پانچویں اوور میں محمد علی نے اپنی نصف سنچری کی جانب بڑھ رہے ٹم سیفرٹ کو آؤٹ کر کے پاکستان کو پہلی کامیابی دلائی۔ ٹم سیفرٹ نے 22 گیندوں پر تین چوکوں اور پانچ چھکوں کی مدد سے 45 رن بنائے ۔ ساتویں اوور میں جہانداد خان نے فن ایلن کو ایل بی ڈبلیو کرکے پویلین بھیج دیا ۔ فن ایلن نے 16 گیندوں پر ایک چوکے اور پانچ چھکوں کی مدد سے 38 رن بنائے ۔ خوشدل شاہ نے اس کے بعد مارک چیپ مین 1 کو آؤٹ کیا۔ ڈیرل مچل 14 اور جمی نیشم 5کو حارث رؤف نے آؤٹ کیا۔ نیوزی لینڈ نے 13.1 اووروں میں پانچ وکٹ پر 137 رن بنا کر پانچ وکٹوں سے میچ جیت لیا۔ مچل نے 16 گیندوں میں 21 اور کپتان مائیکل بریسویل 5 رن بناکر ناٹ آؤٹ رہے ۔ پاکستان کی جانب سے حارث رؤف نے دو جبکہ محمد علی، خوشدل شاہ اور جہانداد خان نے ایک ایک وکٹ حاصل کی۔ اس سے پہلے آج بارش کی وجہ سے ٹاس میں تاخیر ہوئی۔ جس کے بعد اووروں کی تعداد 15-15 اوورکر دی گئی۔ نیوزی لینڈ نے ٹاس جیت کر پہلے گیند بازی کا فیصلہ کیا۔ پاکستان کی بیٹنگ کے دوران اچھی شروعات نہیں رہی اور اس نے اپنے دونوں سلامی بلے بازوں کو 19 کے اسکور پر کھو دیا۔ حسن نوازصفر اور محمد حارث 11 رن بنا کر آؤٹ ہوئے ۔ اس کے بعد کپتان آغا سلمان اور عرفان خان نے اننگز کو سنبھالنے کی کوشش کی۔ ایش سودھی نے ساتویں اوور میں عرفان خان 11 کو آؤٹ کر کے اس شراکت کو توڑا۔ اسی اوور کی آخری گیند پر سوڈھی نے خوشدل شاہ 0 کو آؤٹ کر کے پاکستان کی چوتھی وکٹ حاصل کی۔ پاکستانی بلے باز نیوزی لینڈ کے باؤلنگ اٹیک کے سامنے زیادہ دیر نہ ٹک سکے ۔ 10ویں اوور میں بین سیئرز نے کپتان آغا سلمان کو آؤٹ کر کے پاکستان کو بڑا جھٹکا دیا۔ آغا سلمان نے 28 گیندوں میں چار چوکوں اور تین چھکوں کی مدد سے 46رن بنائے ۔ شاداب خان 26 کو 12ویں اوور میں جیکب ڈفی نے آؤٹ کیا۔ 13ویں اوور میں جمی نیشم نے جہانداد خان 0 اور عبدالصمد 11 کو آؤٹ کیا۔ حارث رؤف (1) 15ویں اوور کی آخری گیند پر رن آؤٹ ہوئے ۔ پاکستان نے 15 اووروں میں نو وکٹوں پر 135 رن بنائے ۔ نیوزی لینڈ کی جانب سے جیکب ڈفی، بین سیئرز، جمی نیشم اور ایش سوڈھی نے دو دو بلے بازوں کو آؤٹ کیا۔
