محمد تسکین
بانہال// سابقہ ایگریکلچر آفیسر اور نیشنل کانفرنس کے سینئر ضلع نائب صدر برائے رامبن محمد افضل وانی ساکنہ بنکوٹ بانہال مختصر علالت کے بعد بدھ کی صبح قریب چھ بجے صدر ہسپتال سرینگر میں رحلت کر گئے ہیں انہیں صحت کی خرابی کے بعد منگل کی رات سرینگر کے صدر ہسپتال منتقل کیا گیا تھا۔ وہ 81 برس کے تھے اور انہیں بدھ کی دوپہر بعد چھاناڑ بنکوٹ گاؤں میں اپنے آبائی قبرستان میں سپرد خاک کیا گیا اور ان کے جنازے میں سینکڑوں لوگوں نے شرکت کی۔ ان کی رحلت پر سیاسی ،سماجی ، دینی اور کئی ملازم تنظیموں نے اپنے رنج و صدمہ کا اظہار کرتے ہوئے سوگوار کنبے خصوصاً ان کے بڑے بیٹے ریٹائرڈ لیکچرار عبد القیوم وانی اور غلام محی الدین وانی ملازم محکمہ پی ایچ ای کے ساتھ اپنی ہمدردی کا اظہار کیا ہے اور مرحوم کی مغفرت کیلئے اللہ سے دعا کی گئی ہے۔ مرحوم خواجہ محمد افضل وانی اپنے علاقے کے ایک بااثر ، شریف النفس، ملنسار ،کم گو اور صوم و صلوٰۃ کے پابند شخص تھے اور اپنی ملازمت سے سبکدوشی کے بعد وہ سیاست سے جڑے رہے اور نیشنل کانفرنس کے سینئر اور بالغ النظرسیاسی لیڈر کے طور جانے جاتے تھے۔ممبر اسمبلی بانہال حاجی سجاد شاہین یہ خبر سنتے ہی جموں سے بانہال پہنچے اور اپنے رفقاء کے ہمراہ سیدھے بنکوٹ جاکر سوگوار کنبے سے تعزیت کی اور ان کی دھاڑس بندھائی۔ ان کے ہمراہ یوتھ نیشنل کانفرنس کے صوبائی نائب صدر طارق احمد ڈار اور دیگر کارکنان موجود تھے۔ اس موقع پر ممبر اسمبلی بانہال حاجی سجاد شاہین نے مرحوم محمد افضل وانی کی خدمات اور ان کی انسانیت کیلئے شاندار الفاظ میں خراج عقیدت پیش کرتے ہوئے کہا کہ مرحوم محمد افضل وانی دنیائے سیاست اور دیگر امورات پر گہری نظر رکھنے والے ایک سرگرم اور باخبر شخصیت کے مالک تھے اور سیاسی دور اندیشی ، ایثار اور فداکاری میں پورے علاقہ بانہال میں ان کا کوئی ثانی نہ تھا اور ان کی رحلت سے بانہال ایک قد آور ، شریف النفس ، معتبر اور مثبث سیاسی نظریات کے حامل ایک اچھے لیڈر سے محروم ہوگئی ہے۔ انہوں نے کہا کہ مرحوم محمد افضل وانی ان کے صلاح و مشورہ کار تھے اور روز اول سے ہی انہوں نے سیاسی میدان میں ان کی رہنمائی اور رہبری کی ہے۔ انہوں نے مرحوم کے ایصال ثواب کیلئے اللہ رب العزت سے ان کی جنت نشینی کی دعا کی ہے اور سوگوار کنبے کے ساتھ اپنے گہرے دکھ اور صدمے کا اظہار کیا۔مرحوم کی رحلت پر اساتذہ ، لیکچرار وں ، پی ایچ ای ملازمین ، پی ایچ ای ڈیلی ویجرس ایسوسیشن سمیت کئی سرکاری ملازمین کی انجمنوں نے لواحقین کے ساتھ اپنی ہمدردی کا اظہار کرتے ہوئے دکھ کی اس گھڑی میں سوگوار کنبے سے اپنی بھرپور ہمدردی کا اظہار کیا ہے ۔ انہوں نے اللہ الغفار سے مرحوم محمد افضل وانی کے روح کے ایصال ثواب اور لواحقین کو اس صدمہ سے نکالنے کیلئے مالک کائنات کے حضور دعا کی ہے۔ مرحوم محمد افضل وانی کے ایصال ثواب کیلئے اجتماعی فاتحہ خوانی ان کے گھر بنکوٹ بانہال میں ہفتے کے روز انجام دی جائے گی۔
