نگروٹہ// نگروٹہ تحصیل کی اطراف و اکناف میں بجلی وپانی سپلائی کے حوالے سے بحرانی صورت حال پرعلاقہ کے عوام میں شدیدتشویش پائی جارہی ہے خاص کرماہ صیام میں علاقہ میں محکمہ بجلی کی طرف سے غیر اعلانیہ بجلی کٹوتی و محکمہ صحت عامہ کی طرف سے غیر سنجیدگی کے مظاہرہ نے نگروٹہ تحصیل کے عوام کو شدت کی اس گرمی میںمخمصے میں ڈال دیا ہے اور علاقہ میںپینے کے صاف پانی اور بجلی کی عدم دستیابی کی وجہ سے خاص طور پر علاقہ کے عوام کو بھاری مصائب کا سامنا ہے ۔عوام پینے کے صاف پانی کی بوند بوند کے لئے ترس رہے ہیں اور علاقہ میں پینے کے پانی کی شدید قلت کی وجہ سے علاقہ میں ہاہاکار مچی ہوئی ہے جموں میں گرمی کی تیز لہر کے چلتے درجہ حرارت 42 ڈگری کو پار کررہا ہے اور محکمہ بجلی ومحکمہ صحت عامہ پانی سپلائی وبجلی نظام میں بہتری لانے کے مخلوط سرکار کے بلند بانگ دعوئوںکے باجود اس بحران سے نپٹنے میں صاف طور پر ناکا م نظر آرہا ہے ۔مقامی لوگوں نے کشمیر اعظمیٰ سے بات کرتے ہوئے محکمہ متعلقہ پر الزام لگایا کہ علاقہ میں میٹر نصب ہونے کے باوجود بجلی کی بارہا آنکھ مچولی کی وجہ سے جگٹی ،پنجگرائیں،چھبہ ،مڑھ ،بمیال کے عوام تذبذب میں مُبتلاہوچکے ہیںاور لوگوں کا خاص کرماہ صیام میں شدت کی اس گرمی میںجینا محال ہوگیا ہے کیو نکہ محکمہ نے دن وشام اور رات کے وقت بغیر اعلان کے بجلی بند کرنے کا سلسلہ شروع کر رکھا ہے جس سے اور علاقہ کے عوام میں محکمہ بجلی و محکمہ صحت عامہ کے تئیںبھاری تشویش پائی جارہی ہے اور محکمہ بجلی و محکمہ صحت عامہ عوام کی بھاری مانگوں کے باوجود غفلت شعاری کے باعث خواب خرگوش میں مبتلاہے ۔علاقہ کے عوام نے ریاستی وزیراعلیٰ سے اس سلسلہ میں خصوصی طور سے اپیل کی ہے کہ وہ اس طرف فوری توجہ دیں اور علاقہ میں خصوصی طور پرپانی اور بجلی سپلائی کو یقینی بنانے کے لئے متعلقہ حکام کو ہدایات دیں۔ بصور ت دیگر علاقہ کے عوام سڑکوں پر نکلنے پر مجبور ہوجائیں گے ۔
