سرینگر// شہام پورہ نوہٹہ میں گندے پانی کی نکاسی کیلئے بچھائی گئی پائپ علاقہ میں ٹریفک حادثوں کا موجب بن رہی ہے اور آئے روز یہاں نہ صرف سکوٹر سوار گر جاتے ہیں بلکہ بارشوں کے دنوں میں راہ گیر پھسل کر گر جاتے ہیں جبکہ سرینگر مونسپل کارپوریشن خواب خرگوش میں ہے ۔شہام پورہ کے لوگوں نے کشمیر عظمیٰ کو بتایا کہ گندے پانی کی نکاسی کیلئے سرینگر میونسپل کارپوریشن کی طرف سے علاقہ میں ہیٹرک شاپ کے متصل گلی میںپائپیں بچھائی گئیں تاہم بعد میں اس پر مٹی یا روڈی نہیں ڈالی گئی جس کی وجہ سے پائپ کھلی ہے۔انہوں نے کہا کہ اب آئے روز یہاں سے گذشرنے والے سکوٹر حادثے کا شکار ہوجاتے ہیں جبکہ با رشوں کے دنوں میں راہ گیر پھسل کر گر جاتے ہیں ۔لوگوں نے بتایا کہ گذشتہ دنوں ایک سکوٹر پائپ کے ساتھ ٹکرانے کے بعد حادثے کا شکار ہوا اور سکوٹر پر سوار ایک خاتون کو چوٹیں آئیں ۔مقامی لوگوں نے الزام لگایا کہ سرینگر میونسپل کارپوریشن کے مقامی اہلکاروں کی توجہ کئی بار اس جانب مبذول کرائی گئی تاہم کوئی کارروائی نہیں ہوئی ۔ایس ایم سی کمشنر ڈاکٹر شفقت حسین نے کشمیر عظمیٰ کو بتایا کہ یہ معاملہ ان کی نوٹس میں نہیں لایا گیا اور جلد ہی علاقہ میں ایک ٹیم جائے گی اور پائپ پر بھرائی ڈالی جائے گی
نکاسی کی پائپ سے شہام پورہ میں آئے روز حادثے
