عظمیٰ نیوز سروس
کرگل //مرکزی زیر انتظام علاقے لداخ کے کرگل ضلع میں نون کن چوٹی (7135 میٹر) پر برفانی طوفان کی وجہ سے ایک کوہ پیما کی جان چلی گئی جبکہ 40 دیگر کوہ پیمائوں کو دشوار گزار ریسکیو آپریشن کے بعد محفوظ مقام پر منتقل کر لیا گیا۔ 26 اگست کی رات اچانک برفباری، تیز ہواؤں اور شدید سردی نے صورتحال کو نہایت خطرناک بنا دیا۔ اس دوران جھارکھنڈ سے تعلق رکھنے والے کمل منڈل، جو انڈین ریلوے میں اسسٹنٹ ویجیلنس آفیسر تھے، برفانی طوفان کی لپیٹ میں آ کر جان بحق ہوگئے۔پولیس اور یونین ٹیریٹری ڈیزاسٹر ریسپانس فورس کے ساتھ مقامی رضاکاروں نے برفانی طوفان میں پھنسے کوہ پیماؤں کی جان بچانے میں کلیدی کردار ادا کیا۔ کئی گھنٹوں کی برفانی تگ و دو اور صفر سے نیچے درجہ حرارت میں سفر طے کرنے کے بعد ریسکیو ٹیموں نے 30سے40 کوہ پیمائوں کو بحفاظت نکالا۔پھنسے ہوئے افراد میں آسٹریلیا کے 52 سالہ کوہ پیما سیڈریک سالدانا بھی شامل تھے، جو برفانی طوفان کے دوران شدید نمونیا کا شکار ہوگئے تھے۔ اس مہم میں ہندوستان، آسٹریا، آسٹریلیا اور پولینڈ کے کوہ پیما شامل تھے، جو نون کن چوٹی کی مہم جوئی پر تھے کہ اچانک موسم بگڑ گیا اور شدید برفانی طوفان نے انہیں اپنی لپیٹ میں لے لیا۔ترجمان نے بتایا کہ فوجی ہیلی کاپٹروں کی مدد سے پھنسے کوہ پیماؤں کو فوری طور پر محفوظ مقام تک نکالا گیا اور مرحوم کوہ پیما کے جسد خاکی کو بھی ایئر لفٹ کیا گیا۔
