رمیش کیسر
نوشہرہ //نوشہرہ سب ڈویژن کے متعدد دیہات، خاص طور پر سرحدی گاؤں شیر مکڑی، میں پینے کے پانی کی شدید قلت نے عوام کو سخت مشکلات سے دوچار کر دیا ہے۔ پانی کی مسلسل عدم دستیابی سے پریشان لوگوں نے سوموار کے روز محکمہ پی ایچ ای کے خلاف زبردست احتجاج کیا۔مظاہرین نے شہر پہنچ کر محکمہ پی ایچ ای کے دفتر کے باہر نعرے بازی کی اور بعد ازاں ایگزیکٹیو انجینئر نوشہرہ سے ملاقات کی۔ مظاہرین نے افسر موصوف کو بتایا کہ محکمہ کے ملازمین کی لاپرواہی کی وجہ سے پانی کے ٹینکوں میں پانی موجود ہونے کے باوجود بھی سپلائی بند ہے، جو عوام کے ساتھ سراسر ناانصافی ہے۔احتجاج کرنے والے لوگوں نے کہا کہ شیر مکڑی جیسے زیرو لائن پر واقع گاؤں کے باسی پانی کہاں سے لائیں؟ اگر کبھی کبھار فوج کی طرف سے گاڑیاں پانی لے آئیں تو گزارا ہو جاتا ہے، ورنہ وہ پیاسے ہی رہ جاتے ہیں۔انہوں نے محکمہ پی ایچ ای کے ملازمین پر ڈیوٹی سے غفلت برتنے اور عوام کی پریشانیوں کو نظر انداز کرنے کا الزام لگایا۔ لوگوں نے انتباہ دیا کہ اگر آئندہ چند دنوں میں پانی کی سپلائی بحال نہ کی گئی تو وہ سڑکوں پر بڑا احتجاج کریں گے اور محکمہ کے خلاف سخت کارروائی کا مطالبہ کریں گے۔عوام نے حکومت سے مطالبہ کیا ہے کہ وہ اس مسئلے کا فوری نوٹس لے کر شیر مکڑی سمیت تمام متاثرہ دیہات میں پینے کے پانی کی باقاعدہ سپلائی یقینی بنائے، تاکہ گرمیوں کے ان ایام میں عوام کو مزید پریشانی کا سامنا نہ کرنا پڑے۔
