آبادیاتی پروفائل ہمیں بتاتا ہے کہ ہماری آبادی میں نوجوانوں کا تناسب نمایاں ہے اورنوجوانوں کی آبادی مسلسل بڑھ رہی ہے۔ اس کا مطلب یہ ہے کہ حکومت کی طرف سے وقتاً فوقتاً وضع کردہ پالیسیوں میں نوجوانوں کی ضروریات اور خواہشات کو مدنظر رکھا جانا چاہئے۔یہ اسی احساس کا نتیجہ ہے کہ حکومت کی جانب سے نوجوانوں پر مبنی مختلف سکیموں کا اعلان کیا جاتا ہے۔ہم اکثر نوجوانوں کو ان سرگرمیوں میں شامل کرنے کے لیے کھیلوں میں شروع کیے جانے والے اقدامات کو دیکھتے ہیں جو ان کی مشکلات کو دور کرتی ہیں۔صرف کھیل ہی نہیں، حکومت روزگار کے حوالے سے جو بھی پالیسیاں بناتی ہے وہ دراصل نوجوانوں کے لئے ہوتی ہیں۔
نئی تعلیمی پالیسی میں ابھرتے ہوئے رجحانات کا بھی خیال رکھا گیا ہے تاکہ ہمارے نوجوان ان رجحانات سے نمٹنے کے لیے بہترین طریقے سے لیس ہوں۔مجموعی طور پر حکومت آبادی کے اس حصے کے بارے میں ہمیشہ فکر مند رہتی ہے کیونکہ اس میں کسی بھی قوم کا مستقبل شامل ہوتا ہے۔ اس کے علاوہ، توانائی کی سطح جو زندگی کے اس مرحلے میں انسان میںہوتی ہے ،وہ غیر معمولی ہوتی ہے۔ یہ توانائی، اگر صحیح طریقے سے استعمال نہ کی جائے تو متعدد نقصانات کا سبب بن سکتی ہے۔یہ ایک نوجوان کی زندگی کو تباہ کر سکتی ہے، اس خاندان کو تباہ کر سکتی ہے جس سے وہ نوجوان آیا ہو، اور جس معاشرے سے وہ آیا ہو، اس کے لئے پریشانی کا باعث بھی بن سکتی ہے۔لیکن اگر اسی توانائی کو مثبت انجام کے لئے استعمال کیا جائے تو یہ فرد کے لئے روشن مستقبل، خاندان کے لئے خوشخبری اور معاشرے میں خاطر خواہ اضافہ کو یقینی بنا سکتی ہے۔مختصر یہ کہ اگر ہمارے نوجوان صحیح راستے پر ہیں تو اس کا مطلب اجتماعی طور پر ہمارے لئے محفوظ مستقبل ہے۔ یہی وجہ ہے کہ ہمارے نوجوانوں پر خصوصی توجہ دینے کی ضرورت ہے اور اس کیلئے ہمہ وقت پالیسیاں بنانے اور ان پر عمل کرنا لازمی ہے۔نوجوانوں کو گمراہ ہونے سے بچانے کیلئے خصوصی توجہ دینے کی ضرورت ہے۔
ہمیں کھیلوں کے لئے ایک اچھا انفراسٹرکچر، تفریح کے لئے جگہیں بنانے کی ضرورت ہے، تاکہ نوجوان آرام کر سکیں۔ ہمیں اپنے تعلیمی اداروں میں ایک ایسا ماحول درکار ہے جہاں ہمارے نوجوان ایسی اقدار کو اپنائیں جو ایک نتیجہ خیز اور بامقصد زندگی یقینی بنا سکیں۔ہمیں ایسے کورسز کی ضرورت ہے جو مختلف دلچسپیوں کو حل کر سکیں جو ہمارے نوجوان اپنی زندگی کے دوران ظاہر کرتے ہیں۔ہمیں ایسے روزگار کے پروگراموں کی ضرورت ہے جو ہمارے کالجوں اور یونیورسٹیوں سے پاس آؤٹ ہونے والے نوجوانوں کو جذب کر سکیں۔ہمیں ایسے کاروباری اوراختراعی صنعت کاری پروگراموں کو فروغ دینے کی ضرورت ہے جو ہمارے نوجوانوں کو راغب کر سکیں اور انہیں ایسی سرگرمیوں میں شامل کر سکیں جو بہت چھوٹی عمر میں ان کے مالی تحفظ کو یقینی بنائیں۔لیکن افسوس کے ساتھ کہنا پڑتا ہے کہ ابھی تک اس سمت میں کچھ زیادہ نہیں کیاگیا ہے ۔نوجوان ہمارا سرمایہ ہے اور ہمیں نوجوانوں کی توانائی کو صحیح سمت دینے کی ضرورت ہے ۔اگر ہمارا نوجوان صحیح سمت پر چل پڑا تو سمجھیں کہ ہماری قوم صحیح راستے پر ہے اور اگر نوجوان ہی راستہ بھٹک گیا تو سمجھیں کہ قوم کا بھی اللہ ہی حافظ ہے۔
یہاں بیروزگاری کی شرح ملکی سطح پر سب سے زیادہ ہے ۔10لاکھ سے زائد نوجوانوں بیروزگاری کی چکی میں پسے جارہے ہیں اور ان کی توانائی او ر صلاحیتوں کو بروئے کار لانے کیلئے کوئی ٹھوس اور نتیجہ خیز حکمت عملی ہمارے پاس نہیں ہے اور پھر ہم کہتے ہیں کہ ہمارا نوجوان غلط راستے پر چل پڑا ہے۔ہمیں سمجھ لینا چاہئے کہ جب ہمارا نوجوان بے کاری کی وجہ سے ذہنی تنائو کا شکار ہو تو وہ مایوسی کے عالم میں کچھ بھی کرسکتا ہے ۔ہمیں نوجوانوں کو مایوسی کے دلدل سے نکال کر اُنہیں امید دلانی ہے ۔جب امید نظر آئے گی تو مایوسی چھٹ جائے گی اور اس بیش بہا توانائی کوخود بخود ایک صحیح سمت مل جائے گی۔ہمیں یہ سمجھ لینا چاہئے کہ یہ نوجوانوں پر ہمہ جہت توجہ ہی ہے جو اجتماعی سطح پر روشن مستقبل کو یقینی بنا سکتا ہے اور جب تک ہم نوجوانوں کی توانائی کو صحیح سمت میں بروئے کار نہ لائیں،اُس وقت تک قوم کا مستقبل روشن ہونا عبث ہے۔
