شمش روئے محمدِ عربیؐ
لیل موئے محمدِ عربیؐ
جابجا در کلام اللہ ہے
مدح روئے محمدِ عربیؐ
پھر اے بادِ صبا قدم بقدم
جا تو سُوئے محمدِ عربیؐ
دل کے احوال جاں، بتا کے تو جا
رو بہ روئے محمدِ عربیؐ
خوش یہ گلشن ہے، زعفراں تا کنول
رنگ و بوئے محمدِ عربیؐ
جان و حشمت جہاں، نِثار یہ سب
خاکِ پائے محمدِ عربیؐ
مسکیں، جیلان اور ہے دلؔ کی لگن
نعت گوئے محمدِ عربیؐ
عا دلؔ حسین
راجپورہ پلوامہ کشمیر
سٹوڈنٹ،جامع ملیہ اسلامیہ، نئی دہلی
موبائل نمبر؛ 7889841414
دُعـــا
جو تھی پِچھلے برس ہے وہی اِس برس اِلتجا اے خُدا
کَل جو مانگی وہی آج بھی مانگتا ہُوں دعا اے خُدا
رنگ میں رنگ مِل جاتے ہیں جِس طرح ایسے ہمکو مِلا
فاصلے درمیاں جو دِلوں کے ہیں اُن کو مِٹا اے خُدا
اے خُدا ! موسمِ نفرت و بُغض و رنجِش کو کر فصلِ گُل
پُھول اخلاص و اُلفت کے سبکے دِلوں میں کِھلا اے خُدا
تیرے بندے مسائِل سے دو چار ہیں اور پریشان ہیں
تُو ہے مُشکِل کُشا مُشکِلیں سب کی آساں بنا اے خُدا
آگ فِرقہ پرستی کی جو پھیلتی جائے ہے ہر طرف
برسا چاروں دِشاؤں میں تُو ایکتا کی گھٹا اے خُدا
صُوفیوں سنتوں گُرؤوں کے اِس دیش کا نام زِندہ رہے
تُو عبادت گہوں کو یہاں ٹُوٹنے سے بچا اے خُدا
نام پر دھرم مذہب کے جو کرتے ہیں قتل و غارت گری
ذہن و دِل کے ہیں کالے اِنہیں روشنی کر عطا اے خُدا
بُھوکے ننگوں پہ سایہ فگن تیری رحمت ہو آٹھوں پہر
دُھوپ میں مُفلِسی کی اِنہیں جلنے سے تُو بچا اے خُدا
موسمِ ہِجر میں وصل کی آس میں آہیں بھرتے ہیں جو
سُنتا ہے سب کی تُو سُن لے اِنکے دِلوں کی صدا اے خُدا
بَیٹھے ہیں منتظر جو دِیا رکھ کے اِمکاں کا دہلیز پر
آہٹ اور سائے اِن کے لئے تُو مجسّم بنا اے خُدا
رُوپ کے گاؤں میں پیار کی گلیوں میں جو ہیں بھٹکے ہُوئے
اُن کی منزِل ہو آساں اِنہیں راستہ تُو دِکھا اے خُدا
دِل دھڑکتے ہیں آنکھوں میں جِن لوگوں کے سُر خرو کر اِنہیں
ہر قدم زندگی کا اِنہیں لُوٹنے دے مزا اے خُدا
پیار سے پیاری اُردو زُبان جو مسائِل سے دو چار ہے
بُغض و نفرت ، حسد اور سازِش سے اِس کو بچا اے خُدا
ہر سحر لائے پیغام خوشیوں کا اور شب کٹے چَین سے
قید سے رنج و غم کی تُو ہر ایک کو کر رِہا اے خُدا
اب نیازؔ اِس سے زیادہ کہے اور کیا صِرف اِتنا بہت
کَل بھی تھا ، آج ہے اور رہے گا تِرا آسرا اے خُدا
نیاز جَیراجپُوری
جالندھری ، اعظم گڑھ،یُوپی
موبائل نمبر؛9452505605
