عظمیٰ نیوز سروس
جموں //سرکاری اور پرائیویٹ سکولوں میں یکساں کتابیں نافذ کرنے کے معاملے پر پیرنٹس ایسوسی ایشن اور بچوں کے والدین نے انتظامیہ کی مکمل حمایت کرتے ہوئے کہاکہ ایل جی انتظامیہ اور اسکول ایجوکیشن کے ڈائریکٹر کو پرائیویٹ اسکول مافیا کے دباؤ میں نہیں آنا چاہیے ۔پیرنٹس ایسوسی ایشن کے صدر امیت کپور نے سرکاری اسکولوں اور پرائیویٹ اسکولوں میں تمام کتابیں یکساں ہونے کے حوالے سے جاری حکم کی مکمل حمایت کرتے ہوئے کہا ہے کہ کسی بھی نجی اسکول کو اپنی مرضی کے مطابق کتابیں لگانے کی اجازت نہیں دی جانی چاہیے۔ موصوف نے سردیوں کے موسم کے پیش نظر بچوں کی چھٹیوں میں توسیع کے فیصلے کا خیر مقدم کیا۔ انہوں نے کہا کہ کچھ پرائیویٹ سکولوں کا مافیا ایل جی انتظامیہ اور ڈائریکٹر آف سکول ایجوکیشن پر دباؤ ڈالنے کی کوشش کر رہا ہے کہ وہ اس حکم کو واپس لے لیں۔ انہوں نے امید ظاہر کی کہ ایل جی انتظامیہ اور اسکول ایجوکیشن کے ڈائریکٹر پرائیویٹ اسکول مافیا کے دباؤ میں نہیں آئیں گے چاہے وہ احتجاج کریں یا کوئی اور حربہ اختیار کریں۔ امیت کپور نے جموں میں ایک پریس کانفرنس کے دوران کہا کہ سخت سردی کی وجہ سے والدین ایسوسی ایشن اور والدین کے مطالبے پر ایل جی انتظامیہ کی جانب سے اسکولوں کی چھٹیوں میں توسیع پر تمام والدین خوش ہیں اور انہوں نے اس پر ایل جی انتظامیہ اور محکمہ اسکول ایجوکیشن کے ڈائریکٹر کا شکریہ ادا کیا ہے۔ موصوف نے کہا کہ پرائیویٹ سکولوں کا مافیا تمام سکولوں میں یکساں کتب لگانے کا حکم واپس لینے کے لئے دباؤ ڈال رہا ہے تاہم والدین، بچے اور والدین انجمن حکام کے ساتھ ہیں اور امید ہے کہ انتظامیہ اس مافیا کے خلاف بھرپور جدوجہد کریں گے۔
