یواین آئی
استنبول// اسرائیلی وزیر اعظم نیتن یاہو کی جانب سے امریکہ جانے کیلئے فرانس سمیت متعدد یورپی ممالک کی فضائی حدود استعمال نہ کرنے کا انکشاف ہوا ہے۔غیر ملکی میڈیا کے مطابق امریکہ جانے کیلئے نیتن یاہو کے طیارے نے گرفتاری کے خوف سے متعدد یورپی ممالک کی فضائی حدود استعمال کرنے سے گریز کیا۔ غزہ میں جنگی جرائم کے الزام میں عالمی فوجداری عدالت (آئی سی سی) نے ان کے وارنٹ گرفتاری جاری کر رکھے ہیں۔آئی 24 نیوز چینل کے سفارتی نامہ نگار امیچائی سٹین کے مطابق نیتن یاہو کے طیارے نے فرانس کی فضائی حدود سے گریز کیا جس سے آئی سی سی کے گرفتاری وارنٹ اور تل ابیب و پیرس کے درمیان غزہ جنگ کے حوالے سے موجودہ کشیدگی کے باعث سفر طویل ہوا۔نامہ نگار نے بتایا کہ اسرائیلی وزیر اعظم کا طیارہ یونان اور اٹلی کے علاوہ کسی یورپی ملک کے اوپر سے نہیں گزرا۔نومبر 2024 میں ہیگ میں قائم عدالت نے نیتن یاہو اور سابق وزیر دفاع یوآو گیلنٹ کے خلاف غزہ میں جنگی جرائم اور انسانیت کے خلاف جرائم کے الزامات میں گرفتاری وارنٹ جاری کیے تھے۔نیتن یاہو تل ابیب سے اقوام متحدہ کی جنرل اسمبلی کے 80ویں اجلاس سے خطاب کرنے اور پیر کو وائٹ ہاؤس میں امریکی صدر ڈونلڈ ٹرمپ سے ملاقات کیلئے روانہ ہوئے۔روانگی سے قبل تل ابیب کے بین گوریون ایئرپورٹ پر صحافیوں سے گفتگو کرتے ہوئے اسرائیلی وزیر اعظم کا کہنا تھا کہ وہ ان ممالک کے رہنماؤں کی مذمت کریں گے جنہوں نے فلسطینی ریاست کو تسلیم کیا۔
