ناجائز تجاوزات ہٹانے کی مہم جاری

سرینگر// ڈل جھیل اور اس کے گرد ونواح میں ناجائز تجاوزات ہٹانے کی مہم کوجاری رکھتے ہوئے لیکس اینڈ واٹر ویز ڈیو لپمنٹ اتھارٹی (LAWDA)  نے جمعرات کو متعدد علاقوں میں کارروائی کرکے 7ڈھانچوں کومنہدم کیا جس دوران لائوڈا کی مسماری ٹیم پر حملے بھی ہوئے ۔ لیکس اینڈ واٹر ویز ڈیو لپمنٹ اتھارٹی نے برین ،منز گام فور شور روڈ نشاط ،مسکین باغ اور سعدہ کدل علاقوں میں غیر قانونی طور تعمیر کئے گئے ڈھانچوں کو منہدم کرنے کیلئے جونہی کارروائی شروع کی تو لوگوں نے ٹیم پر دھاوا بول دیا ۔ڈی ایس پی سہیل ریشی جو کہ لائوڈا کے انفورسمنٹ آفیسر بھی ہیں ،نے بتایا کہ ناجائز طور تعمیر کئے گئے ڈھانچوں کو مسمار کرنے کے دوران ہجوم نے ٹیم پر حملہ کیا اور اوزار چھین لئے ۔انہوں نے کہا کہ ٹیم پر حملہ کرنے والوں کے خلاف پولسی سٹیشن رعناواری میں کیس درج کیا گیا ہے ۔انہوں نے مزید کہا کہ محکمہ عدالتی احکامات کے تحت من وعن زمینی سطح پر متحرک ہے اورانہدامی مہم جاری رہے گی۔لیکس اینڈ واٹر ویز ڈیو لپمنٹ اتھارٹی نے ڈل اور نگین جھیلوں کے گرد و نواح میں غیر قانونی طور ڈھانچے تعمیر کرنے والوں کو متنبہ کیا ہے کہ وہ اپنی حرکتوں سے باز آئیں ۔انہوں نے کہا کہ ان کے دائرہ اختیار میں آنے والے غیر قانونی طور تعمیر کئے گئے ڈھانچوں اور عمارتوں کو منہدم کرنے کی کارروائی جاری رہے گی او راس عمل میں رکاوٹیں پیدا کرنے والوں کے خلاف قانون کے تحت کارروائی عمل میں لائی جائے گی۔انہوںنے کہا کہ لائوڈا کے حدود اختیار میںرہنے والے شہریوں کو ہدایت دی گئی ہے کہ وہ غیر قانونی کوئی بھی تعمیراتی کام ہاتھ میںنہ لیں ۔انہوںنے  ٹپر اور لوڈ کیئر مالکا ن کو متنبہ کیا کہ ڈل اور نگین جھیلوں کے ممنوع علاقوں میں تعمیراتی مواد نہ لے جائیں۔