رمیش کیسر
نوشہرہ //نائب وزیر اعلیٰ سریندر چوہدری نے نوشہرہ کے پی ڈبلیو ڈی ڈاک بنگلہ کا دورہ کیا تاکہ وہاں جاری تعمیراتی کاموں کی پیش رفت کا جائزہ لیا جا سکے۔ اس موقع پر انہوں نے خصوصی طور پر ڈاک بنگلہ میں تعمیر ہو رہے کانفرنس ہال کی تعمیر پر توجہ مرکوز کی۔حکام نے نائب وزیر اعلیٰ کو آگاہ کیا کہ اس منصوبے پر 2 کروڑ 49 لاکھ روپے کی لاگت آئے گی اور یہ دسمبر 2025 تک مکمل کر لیا جائے گا۔معائنے کے دوران نائب وزیر اعلیٰ نے تعمیراتی کاموں کے معیار کا باریک بینی سے جائزہ لیا اور عملدرآمد کرنے والے اداروں کو ہدایت دی کہ کام کی رفتار تیز کی جائے اور اعلیٰ معیار کو ہر صورت یقینی بنایا جائے۔انہوں نے زور دے کر کہا کہ ترقیاتی منصوبے علاقے کی مجموعی ترقی اور عوامی فلاح و بہبود کے لئے نہایت اہم ہیں، اس لئے معیار پر کسی صورت سمجھوتہ نہیں ہونا چاہیے۔سریندر چوہدری نے حکام کو تاکید کی کہ منصوبوں کی بروقت تکمیل کو یقینی بنانے کے لئے تمام رکاوٹوں کا فوری ازالہ کیا جائے اور کاموں کی باقاعدہ نگرانی و جانچ کا نظام قائم کیا جائے تاکہ شفافیت اور جوابدہی کو فروغ دیا جا سکے۔انہوں نے کہا کہ حکومت عوامی بہبود کے منصوبوں کو ترجیحی بنیادوں پر مکمل کرنے کے لئے پرعزم ہے اور ہر ممکن وسائل بروئے کار لائے جا رہے ہیں تاکہ تعمیر و ترقی کے اہداف حاصل کیے جا سکیں۔
