آفت زدہ خاندانوں کو مستحکم زمین پر 5مرلہ پلاٹ دینے کا اعلان، مکمل مدد کی یقین دہانی
عظمیٰ نیوزسروس
جموں//جموں و کشمیر نیشنل کانفرنس کے سینئر لیڈر اور نائب وزیر اعلی سریندر چودھری نے کابینہ کے وزیر ستیش شرما اور صوبائی صدر (جموں) رتن لال گپتا کے ساتھ راہ، سیلوٹ اور پرگوال کے بارش سے متاثرہ علاقوں کا ایک وسیع دورہ کیا ۔نائب وزیر اعلیٰ نے راہ سیلوٹ پرگوال، برکھل، مالابالا اور نرسنگ پورہ اور پرگوال کے دیگر ملحقہ دیہاتوں کا بھی دورہ کیا، جہاں انہوں نے مذکورہ علاقوں میں بھاری بارش اور لینڈ سلائیڈنگ سے ہونے والے بڑے پیمانے پر نقصانات کا جائزہ لیا۔ انہوں نے ریلیف اور بحالی کی جاری کوششوں کا جائزہ لیا اور عہدیداروں کو امداد کی تقسیم اور بنیادی ڈھانچے کی بحالی میں تیزی لانے کی ہدایت کی۔طویل مدتی حل کی ضرورت پر روشنی ڈالتے ہوئے، ڈپٹی سی ایم چودھری نے متاثرہ خاندانوں کو مستحکم اراضی پر 5مرلہ پلاٹ مختص کرنے کا اعلان کیا، جو محکمہ ارضیات اور کان کنی کے فزیبلٹی ٹیسٹ سے مشروط ہے۔ انہوں نے خطرے سے دوچار علاقوں کی نشاندہی کرنے اور بادل پھٹنے، لینڈ سلائیڈنگ اور اچانک سیلاب کی وجہ سے مستقبل میں ہونے والی آفات کو روکنے کے لیے پورے خطے کا جامع جیولوجیکل آڈٹ کرانے کی اہمیت پر زور دیا۔کابینی وزیر ستیش شرما، این سی کے صوبائی صدر رتن لال گپتا کے ساتھ، انہوں نے راہ سلیوٹ میں ریلیف کیمپوں کا بھی دورہ کیا اور بے گھر خاندانوں سے بات چیت کی۔ قائدین نے نکاسی آب، سڑک کی حفاظت اور پشتوں سے متعلق شکایات سنیں اور عوام کو یقین دلایا کہ ان کے خدشات کو فوری طور پر دور کیا جائے گا۔کابینہ وزیر ستیش شرما نے عوام کے تئیں حکومت کے عزم کو دہرایا۔ ستیش شرما نے سیلاب سے متاثرہ لوگوں میں امدادی سامان تقسیم کیا۔انہوںنے کہا’’یہ ہمارے لوگوں کے لیے ایک مشکل وقت ہے، لیکن میں آپ کو یقین دلاتا ہوں کہ کسی بھی خاندان کو لاوارث نہیں چھوڑا جائے گا۔ حکومت ریلیف فراہم کرنے، ضروری خدمات کی بحالی، اور متاثرہ گھرانوں کی زندگیوں کی تعمیر نو میں مدد کرنے کے لیے ہر ممکن اقدام کر رہی ہے‘‘۔انہوں نے پی ڈبلیو ڈی اور دیہی ترقی کے محکموں کو بھی ہدایت دی کہ وہ تباہ شدہ سڑکوں، پلوں اور اندرونی لنک سڑکوں کی فوری بحالی شروع کریں تاکہ ہموار رابطے کو یقینی بنایا جا سکے اور امداد کی فوری تقسیم کو آسان بنایا جا سکے۔آخر میں سریندر چودھری، سائیش شرما اور رتن لال گپتا ،کرشن لال پنچایت چورا بلاک چوکی چورا کے گھر گئے جہاں مچیل یاترا کے بادل پھٹنے سے چار افراد کی موت ہو گئی تھی اور متوفی کے خاندان سے دلی تعزیت کا اظہار کیا اور عمر عبداللہ اور حکومت کی مکمل حمایت کا یقین دلایا۔نائب وزیر اعلیٰ نے اپنے دورے کا اختتام انتظامیہ کے ہائی الرٹ ہونے کی تصدیق کرتے ہوئے کیا جب تک کہ حالات مکمل طور پر بحال نہیں ہو جاتے اور لوگوں کو یقین دلایا کہ وہ امدادی اور بحالی کے کاموں کی پیش رفت کی ذاتی طور پر نگرانی کریں گے۔
